শ্বেখ হাছিনা চৰকাৰক ক্ষমতাৰ পৰা উৎখাত কৰাত গুৰুত্বপূৰ্ণ ভূমিকা গ্ৰহণ কৰা ছাত্ৰ নেতা মহম্মদ নাহিদ ইছলামে মহম্মদ ইউনুছ নেতৃত্বাধীন অন্তৱৰ্তীকালীন চৰকাৰৰ পৰা পদত্যাগ কৰে। দূৰসংযোগ আৰু তথ্য প্ৰযুক্তি মন্ত্ৰালয়ৰ উপদেষ্টাৰ দায়িত্বত থকা নাহিদে মঙলবাৰে মুখ্য উপদেষ্টা মহম্মদ ইউনুছৰ হাতত পদত্যাগ পত্ৰ দাখিল কৰে।
চৰকাৰত থকাৰ পৰিৱৰ্তে সক্ৰিয়ভাৱে ৰাজপথলৈ ওলাই আহি কাম কৰাৰ উদ্দেশ্যে পদত্যাগ কৰা বুলি উল্লেখ কৰিছে নাহিদ ইছলামে।
ঢাকা ট্ৰিবিউনৰ প্ৰতিবেদন অনুসৰি পদত্যাগ কৰাৰ কেইঘণ্টামান পিছতে ৰাজ্যিক অতিথিশালাত সংবাদমেল সম্বোধন কৰি মহম্মদ নাহিদ ইছলামে জনসাধাৰণৰ সৈতে পোনপটীয়াকৈ সংযোগ স্থাপনৰ প্ৰয়োজনীয়তাৰ ওপৰত গুৰুত্ব আৰোপ কৰি কয় যে যোৱা ছমাহত তেওঁ তথ্য আৰু সম্প্ৰচাৰ উপদেষ্টা পদত অধিষ্ঠিত হৈ অৰিহণা যোগাবলৈ চেষ্টা কৰিছিল।
মন্ত্ৰীসভাৰ পৰা পদত্যাগ সন্দৰ্ভত নাহিদ ইছলামে কয়, ‘মই চৰকাৰৰ বাহিৰত থকাটো প্ৰয়োজনীয় বুলি অনুভৱ কৰিছো। গণবিদ্ৰোহৰ আকাংক্ষা এতিয়াও পূৰণ হোৱা নাই। ন্যায় আৰু সংস্কাৰৰ প্ৰতিশ্ৰুতিৰে চৰকাৰ গঠন কৰা হৈছিল। এতিয়াও আন দুজন ছাত্ৰই পৰামৰ্শদাতা পদত অধিষ্ঠিত, চৰকাৰৰ ভিতৰত তেওঁলোকৰ আৰু অধিক দায়িত্ব আছে। দুয়োজনে চৰকাৰত থাকি ৰাইজৰ সেৱা কৰিব আৰু যেতিয়া তেওঁলোকে অনুভৱ কৰিব যে সকলো ঠিকেই আছে তেতিয়া তেওঁলোকে পদ এৰিব।’
ইফালে ৰাজনৈতিক ভৱিষ্যত সন্দৰ্ভত সোধা প্ৰশ্নৰ উত্তৰত নাহিদে কয় যে তেওঁ নতুন ৰাজনৈতিক শক্তি আৰু দলত যোগদান কৰিব বিচাৰে। নিজৰ লক্ষ্যৰ বিষয়ে ব্যাখ্যা কৰি তেওঁ কয় যে তেওঁ মানুহৰ সৈতে পুনৰ সংযোগ স্থাপন কৰিব বিচাৰে। আকৌ এবাৰ তেওঁলোকক একত্ৰিত কৰিব বিচাৰে। সেইবাবেই তেওঁ পদত্যাগ কৰিছে।
