ভাৰতৰ পৰা উৎপত্তি হোৱা সিন্ধু নদীৰ বাবেই পাকিস্তানৰ ভাগ্য সলনি হ’বলৈ গৈ আছে। প্ৰাচীন কালত যেতিয়া মানুহে গুহাত বাস কৰিছিল তেতিয়া এই নদী উপত্যকা সভ্যতাৰ উন্মেষ ঘটিছিল, যিটো আজি সমগ্ৰ বিশ্বতে সিন্ধু উপত্যকা সভ্যতা বুলি জনা যায়।
এই নদীৰ তলিত সোণৰ খনিৰ উমান পোৱা গৈছে। এতিয়া পাকিস্তান চৰকাৰে ইয়াকে উলিয়াবলৈ এক ডাঙৰ পৰিকল্পনা কৰিছে। পাকিস্তানৰ এক চৰকাৰী সমীক্ষা অনুসৰি, নদী উপত্যকাত শ শ কোটি পাকিস্তানী টকাৰ সোণৰ মজুত পোৱা গৈছে। এই তথ্য ৩ মাৰ্চত এক প্ৰতিবেদনত পোহৰলৈ আহিছে।
এক প্ৰতিবেদন অনুসৰি, এই সোণৰ মজুত পঞ্জাৱ প্ৰদেশৰ আটটক জিলাত পোৱা গৈছে। চৰকাৰে কৰা এক সমীক্ষাৰ সময়ত এই আৱিষ্কাৰ পোহৰলৈ আহে।
অৰ্থনৈতিক সংকটৰ সন্মুখীন হোৱা পাকিস্তানে এই আৱিষ্কাৰক নিজৰ অৰ্থনীতিৰ জীৱনৰেখা হিচাপে বিবেচনা কৰিছে। এতিয়া এই ধন উলিয়াবলৈ পৰিকল্পনা কৰা হৈছে, যিয়ে দেশক অৰ্থনৈতিক শক্তি প্ৰদান কৰিব পাৰে।
পাকিস্তানৰ চৰকাৰী অভিযান্ত্ৰিক সেৱা কোম্পানী নেচনেল ইঞ্জিনিয়াৰিং চাৰ্ভিচেছ পাকিস্তান (নেছপাক) আৰু পঞ্জাৱৰ খনি আৰু খনিজ বিভাগৰ নেতৃত্বত চলিব এই খনন প্ৰকল্প। এই আৱিষ্কাৰ পাকিস্তানৰ খনন উদ্যোগৰ বাবে এক ডাঙৰ মাইলৰ খুঁটি হিচাপে প্ৰমাণিত হ’ব পাৰে।
এক সংবাদ মাধ্যমে প্ৰকাশ কৰা অনুসৰি, নেছপাকৰ পৰিচালন সঞ্চালক জৰ্গাম ইছাক খানৰ উদ্ধৃতিৰে প্ৰতিবেদনত কোৱা হৈছে যে, “সিন্ধু নদীৰ কাষৰীয়া আটক জিলাৰ ৯টা প্লেচাৰ গোল্ড ব্লকৰ নিলামৰ বাবে নিলামৰ নথিপত্ৰ প্ৰস্তুত আৰু লেনদেন পৰামৰ্শদাতা সেৱা আগবঢ়োৱা হৈছে।
ভূতত্ত্ববিদসকলৰ মতে, এই সোণ হিমালয়ৰ পৰা সিন্ধু নদীৰ মাজেৰে বৈ গৈছে আৰু পাকিস্তানৰ অঞ্চলত জমা হৈছে। বিভাজনৰ পূৰ্বে এই অংশ ভাৰতৰ আছিল যদিও এতিয়া ই পাকিস্তানৰ অংশ। নদীত সৰু সৰু টুকুৰা বা নগেট ৰূপত সোণ পোৱা যায়। অবিৰত প্ৰবাহৰ বাবে এই সোণৰ কণাবোৰ সমতল বা নিখুঁতভাৱে ঘূৰণীয়া হৈ পৰে। প্ৰতিবেদন অনুসৰি, সিন্ধু নদী উপত্যকা খনিজ সম্পদেৰে চহকী আৰু ইয়াক বহুমূলীয়া ধাতুৰ ভঁৰাল হিচাপে গণ্য কৰা হয়।
এক প্ৰতিবেদনে প্ৰকাশ কৰা অনুসৰি, ২০২৪ চনৰ ডিচেম্বৰৰ ভিতৰত পাকিস্তানৰ সোণৰ মজুতৰ মূল্য ৫.৪৩ বিলিয়ন ডলাৰ হ’ব। কিন্তু বৰ্তমান দেশত এক ভয়াৱহ অৰ্থনৈতিক সংকটৰ সন্মুখীন হৈছে। বৈদেশিক মুদ্ৰাৰ মজুত হ্ৰাস পোৱা আৰু মুদ্ৰাৰ দুৰ্বলতাৰ বাবে আৰ্থিক অসুবিধাৰ সন্মুখীন হৈছে পাকিস্তান।
যদি এই খনন অভিযান সফল হয় আৰু পাকিস্তানে এই সোণ আহৰণ কৰিবলৈ সক্ষম হয়, তেন্তে ই দেশৰ সোণৰ উৎপাদন বৃদ্ধি কৰাৰ লগতে বিশ্বব্যাপী স্থিতি শক্তিশালী কৰিব। এই আৱিষ্কাৰ পাকিস্তানৰ বাবে অৰ্থনৈতিক আশীৰ্বাদ হিচাপে প্ৰমাণিত হ’ব নে হেৰুৱা সুযোগ হৈয়ে থাকিব সেয়া অনাগত মাহতে নিৰ্ধাৰণ কৰিব।
