শ্বেখ হাছিনা ক্ষমতাচ্যুত হোৱাৰ পিছৰে পৰা মহম্মদ ইউনুছৰ নেতৃত্বত চলি থকা বাংলাদেশ চৰকাৰে গ্ৰহণ কৰিছে আন এটা কঠোৰ সিদ্ধান্ত। বিগত বৰ্ষত শ্বেখ হাছিনাৰ বিৰুদ্ধে হোৱা প্ৰতিবাদৰ সময়ত যিসকল শিক্ষকে আৱামি লীগ (শ্বেখ হাছিনাৰ দল)ক সমৰ্থন আগবঢ়াইছিল, সেইসকল লোকক ইউনুছ চৰকাৰে নিলম্বন কৰিছে।
বিভিন্ন সংবাদ মাধ্যমত প্ৰকাশ পোৱা খবৰ অনুসৰি বাংলাদেশ চৰকাৰে সৰ্বমুঠ ৫০ গৰাকী শিক্ষকক নিলম্বন কৰিছে।
উল্লেখ্য যে, ২০২৪ চনত শ্বেখ হাছিনাৰ বিৰুদ্ধে প্ৰতিবাদৰ সময়ত আৱামি লীগক সমৰ্থন কৰাৰ অভিযোগত বহু শিক্ষকক ক্লাছ কৰাত বাধা প্ৰদান কৰা হৈছিল। এই কাৰ্যৰ পিছত অভিযুক্ত শিক্ষকসকলে বহু সমস্যাৰ সন্মুখীন হৈছে।
অভিযুক্ত শিক্ষকসকলৰ বিৰুদ্ধে বিশ্ববিদ্যালয় প্ৰশাসনে এখন তদন্ত সমিতি গঠন কৰিছিল। কিন্তু বহু মাহ উকলি যোৱাৰ পিছতো পাঠদান কৰিব পৰা নাই শিক্ষকসকলে। এতিয়া খবৰ আহিছে যে প্ৰায় ৫০ গৰাকী শিক্ষকক নিলম্বন কৰা হৈছে।
দাবী কৰা হৈছে যে বাংলাদেশত মহম্মদ ইউনুছ ক্ষমতালৈ অহাৰ পিছত দেশৰ বহু বিশ্ববিদ্যালয়ত বহু শিক্ষক আৰু ছাত্ৰ-ছাত্ৰীক নিলম্বন কৰা হৈছে।
ইফালে হাছিনা চৰকাৰৰ বিৰুদ্ধে হোৱা বিদ্ৰোহৰ সময়ত প্ৰতিবাদকাৰী শিক্ষাৰ্থীৰ ওপৰত আক্ৰমণ কৰাৰ অভিযোগত ঢাকা বিশ্ববিদ্যালয় কৰ্তৃপক্ষই ১২৮গৰাকী শিক্ষাৰ্থীক নিলম্বন কৰিছে। নিলম্বনৰ সন্মুখীন হোৱা অধিকাংশ শিক্ষাৰ্থীয়ে হৈছে আৱামি লীগৰ ছাত্ৰ সংগঠন বাংলাদেশ ছাত্ৰ লীগৰ। ২০২৪ চনৰ অক্টোবৰত ইউনুছ চৰকাৰে বাংলাদেশ ছাত্ৰ লীগক সন্ত্ৰাসবাদ বিৰোধী অধিনিয়মৰ অধীনত নিষিদ্ধ কৰিছিল।
উল্লেখ্য যে, হাছিনা চৰকাৰৰ পতনৰ পিছৰে পৰা বাংলাদেশৰ ইউনুছ চৰকাৰৰ বিৰুদ্ধে হাছিনাৰ সমৰ্থক সকলক দমন কৰাৰ অভিযোগ উত্থাপন হৈ আহিছে। হাছিনা চৰকাৰৰ পতনৰ পিছত আৱামি লীগৰ বহু নেতা হত্যাৰ বলি হোৱা বুলিও বিভিন্ন সময়ত বাতৰি প্ৰকাশ পাই আহিছে।
