অবৈধভাৱে বসবাস কৰি থকা ভাৰতীয় নাগৰিকক আমেৰিকাৰ পৰা বিতাড়িত কৰা কোনো নতুন কথা নহয়। বিগত কেইবা বছৰ ধৰি আমেৰিকা চৰকাৰে এইধৰণৰ লোকক নিজৰ দেশৰ পৰা বিতাড়ন কৰি আছে আৰু এই সংখ্যা কেইবা হাজাৰ। আজি বিদেশ মন্ত্ৰালয়ে লোকসভাত এই মন্তব্য কৰে।
বৈদেশিক মন্ত্ৰালয়ৰ তথ্য অনুসৰি এয়া শেহতীয়া প্ৰক্ৰিয়া নহয়। আমেৰিকাই দীৰ্ঘদিন ধৰি অবৈধভাৱে বাস কৰা লোকসকলক বিতাড়িত কৰি আহিছে। মন্ত্ৰালয়ে ২০০৯ চনৰ পৰা ২০২৫ চনলৈকে বিতাড়ণৰ তথ্য প্ৰকাশ কৰি জানিব দিয়ে যে, ২০০৯ চনৰ পৰা ২০২৪ চনৰ শেষলৈকে ১৫,৫৬৪ ভাৰতীয়ক আমেৰিকাৰ পৰা বিতাড়িত কৰা হৈছে। ২০২৫ চনত এতিয়ালৈকে (মাৰ্চ পৰ্যন্ত) ৩৮৮ জন ভাৰতীয়ক আমেৰিকাৰ উভতাই পঠিওৱা হৈছে।
কি পৰিস্থিতিত বিতাড়ন কৰা হয়?
বৈদেশিক পৰিক্ৰমা মন্ত্ৰালয়ে স্পষ্ট কৰি দিয়ে যে কোনো দেশত অবৈধভাৱে প্ৰৱেশ কৰা আৰু ভিছাৰ ম্যাদ উকলি যোৱাৰ পিছতো তাত থকা ভাৰতীয় নাগৰিকৰ ক্ষেত্ৰত বিতাড়ন প্ৰযোজ্য হ’ব পাৰে। কোনো বৈধ নথি-পত্ৰ নোহোৱাকৈ বিদেশী ভূমিত বাস কৰা বা যাৰ বিৰুদ্ধে অপৰাধমূলক গোচৰ পঞ্জীয়ন কৰা হয়।
ইয়াৰ উপৰি আন্তঃৰাষ্ট্ৰীয় আইন অনুসৰি প্ৰতিখন দেশেই নিজৰ অবৈধ অনুপ্ৰৱেশকাৰীক ঘূৰাই লোৱাৰ বাধ্যবাধকতা আছে। কিন্তু নেশ্যনেলিটি পৰীক্ষণৰ পাছতহে এই প্রক্রিয়া সম্পূর্ণ হয়।
উল্লেখ্য যে, ৰাষ্ট্ৰপতি ড’নাল্ড ট্ৰাম্প ক্ষমতালৈ অহাৰ পিছত আমেৰিকাত অবৈধ অনুপ্ৰৱেশকাৰীৰ বিৰুদ্ধে কঠোৰ ব্যৱস্থা তীব্ৰতৰ হৈ পৰে। বৃহৎ সংখ্যক অবৈধ ভাৰতীয় অনুপ্ৰৱেশকাৰীক দেশৰ পৰা বহিষ্কাৰ কৰা হয়।
