৪ এপ্ৰিলত গাজা ষ্ট্ৰিপত পুনৰ ইজৰাইলৰ আক্ৰমণত প্ৰাণহানি হয় ১৭ জনকৈ লোকৰ। ইজৰাইলে হামাছৰ বিৰুদ্ধে আক্ৰমণ তীব্ৰতৰ কৰিবলৈ পেলেষ্টাইন ভূখণ্ডলৈ অধিক সৈন্য প্ৰেৰণ কৰিছে।
ইজৰাইলৰ সেনাৰ বিমান আক্ৰমণত গাজাৰ দক্ষিণৰ খান ইউনিছ চহৰত কমেও ১৭ জন লোকৰ প্ৰাণহানি হয়। আক্ৰমণৰ ঘণ্টাৰ পিছতো মানুহে ধ্বংসাৱশেষত জীৱিত লোকৰ সন্ধানত আছিল এই আক্ৰমণ ইজৰাইলৰ কেইবাদিনো আক্ৰমণৰ পিছত, য’ত কমেও ১০০ জন লোক প্ৰাণ হেৰুৱাইছে। ইজৰাইলে নিজৰ পণবন্দীসকলক মুকলি কৰি দিবলৈ হামাছক হেঁচা প্ৰয়োগ কৰি সামৰিক অভিযান তীব্ৰতৰ কৰি তুলিছে।
ইজৰাইলে ৪ এপ্ৰিলত কয় যে, তেওঁলোকে নিজৰ নিৰাপত্তা মণ্ডল সম্প্ৰসাৰণৰ বাবে উত্তৰ গাজাত স্থলভাগৰ কাৰ্যকলাপ আৰম্ভ কৰিছে। ইজৰাইলী সেনাই আশা কৰা মতে স্থল অভিযানৰ পূৰ্বে উত্তৰ গাজাৰ কিছু অংশ ব্যাপকভাৱে খালী কৰাৰ নিৰ্দেশ জাৰি কৰিছিল।
ৰাষ্ট্ৰসংঘৰ মানৱীয় কাৰ্যালয়ে জনোৱা মতে, বিগত মাহত ইজৰাইলে হামাছৰ সৈতে যুদ্ধবিৰতিৰ অন্ত পেলোৱাৰ পাছৰে পৰা প্ৰায় ২ লাখ ৮০ হাজাৰ পেলেষ্টাইনী সাধাৰণ নাগৰিক স্থানচ্যুত হৈছে।
ইফালে ৩ এপ্ৰিলত ইজৰাইলৰ যুদ্ধ বিমানে গাজা ষ্ট্ৰিপত বিধ্বংসী ৰূপ ধাৰণ কৰে। এই বিমান আক্ৰমণত গাজাত কমেও ১০০ জন লোক নিহত হয়। ইয়াৰ ভিতৰত উত্তৰ গাজাৰ এখন বিদ্যালয়ত বিমান আক্ৰমণত আশ্ৰয় লোৱা ৩৩ জন লোক নিহত হয়। বিদ্যালয়খনত এই আক্ৰমণত আহত হয় ৭০জন লোক। পেলেষ্টাইনৰ স্বাস্থ্য বিষয়াসকলে এই তথ্য প্ৰদান কৰে।
শেহতীয়াকৈ ইজৰাইলে এই আক্ৰমণৰ পৰিসৰ বৃদ্ধি কৰিছে। ইফালে ইজৰাইলী সেনাই কয় যে, হামাছৰ ওপৰত হেঁচা প্ৰয়োগ কৰা আৰু সকলো নাগৰিককে গাজাৰ পৰা খেদি পঠিওৱাৰ লক্ষ্যৰে এই আক্ৰমণ তীব্ৰতৰ কৰিছে।
