২০০৮ চনৰ ২৬ নৱেম্বৰত মুম্বাইত হোৱা ভয়ংকৰ সন্ত্ৰাসবাদী আক্ৰমণৰ মাষ্টাৰমাইণ্ড তাহাউৰ হুছেইন ৰাণাক বৃহস্পতিবাৰে এখন বিশেষ বিমানেৰে আমেৰিকাৰ পৰা ভাৰতলৈ প্ৰত্যৰ্পণ কৰা হয়। মাৰ্কিন উচ্চতম ন্যায়ালয়ত ৰাণাৰ আৰ্জি নামঞ্জুৰ হোৱাৰ পিচতে আমেৰিকা প্ৰশাসনে ভাৰতক গতাই দিয়ে।
ৰাণাক ভাৰতলৈ প্ৰত্যৰ্পণ কৰিবৰ বাবে এন আই এৰ লগতে আন তদন্তকাৰী সংস্থাৰ এটা বিশেষ দল আমেৰিকালৈ গৈছিল। এই দলটোৰ সৈতেই বুধবাৰে ভাৰতীয় সময় অনুসৰি ৭.১০ বজাত বিশেষ বিমানেৰে অভিযুক্ত ৰাণাক ভাৰতলৈ প্ৰেৰণ কৰা হয়।
১৯৯৭ চনত হোৱা প্ৰত্যৰ্পণ চুক্তি অনুসৰিয়েই আমেৰিকাই ভাৰতক গতাই দিছে ৰাণাক। এই খবৰ বিয়পি পৰাৰ পিছতে দিল্লীৰ তিহাৰ কাৰাগাৰ আৰু মুম্বাইৰ আনাৰ্ক ৰোড কাৰাগাৰত সাজু কৰা হৈছে অতি কটকটীয়া নিৰাপত্তা য়াৰ্ড। জানিব পৰা অনুসৰি, ৰাণাক দিল্লীত প্ৰথমে চলোৱা জেৰাৰ পিচত মুম্বাইলৈ নিয়া হ’ব।
তাহাউৰ হুছেইন ৰাণাক প্ৰত্যৰ্পণৰ খবৰ পোৱাৰ লগে লগে তেওঁক কি শাস্তি দিয়া হ’ব সেই সম্পৰ্কে আলোচনা তীব্ৰতৰ হৈ পৰিছে। ২০০৮ চনৰ ২৬ নৱেম্বৰত মুম্বাইৰ একাধিক স্থানত সংঘটিত হোৱা আক্ৰমণৰ ষড়যন্ত্ৰ ৰচনা কৰাৰ অভিযোগ আছে ৰানাৰ বিৰুদ্ধে।
পাকিস্তানৰ পৰা সাগৰেৰে অহা ১০ জনীয়া সন্ত্ৰাসবাদীৰ এটা দলে এই আক্ৰমণ সংঘটিত কৰিছিল। এই আক্ৰমণত ১৬৬ জন লোক নিহত হয়। নিহতসকলৰ ভিতৰত ছয়জন আমেৰিকান নাগৰিকো আছিল।
এই আক্ৰমণৰ সময়ত নিৰাপত্তা বাহিনীয়ে আজমল কাছাব নামৰ এজন সন্ত্ৰাসবাদীক জীৱিত অৱস্থাত ধৰিছিল। বাকী ৯ জন সন্ত্ৰাসবাদীক নিৰাপত্তাৰক্ষীৰে হোৱা সংঘৰ্ষত নিহত হৈছিল।
জীৱন্তে ধৰা পৰা সন্ত্ৰাসবাদী কাছাবক ২০১২ চনৰ ২১ নৱেম্বৰত পুনেৰ য়েৰৱাদা জেলত ফাঁচী দিয়া হৈছিল।
