২০ এপ্ৰিল অৰ্থাত দেওবাৰে ৰহস্যজনক অৱস্থাত উদ্ধাৰ হয় কৰ্ণাটকৰ প্ৰাক্তন আৰক্ষী সঞ্চালক প্ৰধান ওম প্ৰকাশৰ মৃতদেহ। বাংগালুৰুৰ এচএছআৰ লেআউটস্থিত নিজৰ তিনিমহলীয়া বাসগৃহৰ গ্ৰাউণ্ড ফ্লৰত তেজেৰে লুতুৰি পুতুৰি অৱস্থাত প্ৰাক্তন আৰক্ষী সঞ্চালক প্ৰধানজনৰ মৃতদেহ উদ্ধাৰ হয়।
মৃতদেহ দেখাৰ পিছতে ওম প্ৰকাশৰ পত্নীয়ে আৰক্ষীক ঘটনাৰ খবৰ দিয়ে। ঘটনাস্থলত উপস্থিত হোৱা আৰক্ষীয়ে জনোৱা অনুসৰি প্ৰাক্তন আৰক্ষী সঞ্চালক প্ৰধানজনৰ মৃতদেহত আঘাতৰ চিন স্পষ্ট আৰু সেয়ে এয়া হত্যাকাণ্ড বুলি সন্দেহ কৰা হৈছে।
ইয়াৰ উপৰি এই ঘটনাত প্ৰাক্তন আৰক্ষী সঞ্চালক প্ৰধানজনৰ কোনো আত্মীয় জড়িত থকাৰো সন্দেহ প্ৰকাশ কৰিছে শীৰ্ষ আৰক্ষী বিষয়াই। বৰ্তমান মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে আৰু তদন্ত আৰম্ভ কৰিছে।
ওম প্ৰকাশৰ পত্নী আৰু কন্যাক তেওঁৰ মৃত্যুৰ সন্দৰ্ভত জেৰা আৰম্ভ কৰিছে আৰক্ষীয়ে। পিটিআইৰ এক প্ৰতিবেদন অনুসৰি অৱসৰপ্ৰাপ্ত ডিজিপিগৰাকীয়ে ইয়াৰ পূৰ্বে একাংশ ঘনিষ্ঠৰ পৰা নিজৰ জীৱনলৈ ভাবুকি কঢ়িয়াই অনা বুলি উদ্বেগ প্ৰকাশ কৰিছিল।
১৯৮১ বেচ্চৰ ৬৮ বছৰীয়া আই পি এছ বিষয়াজন বিহাৰৰ চম্পাৰাণৰ মূল বাসিন্দা আৰু তেওঁ ভূতত্ত্বত স্নাতকোত্তৰ ডিগ্ৰী লাভ কৰে। ২০১৫ চনৰ ১ মাৰ্চত তেওঁ আৰক্ষী সঞ্চালক প্ৰধান হিচাপে নিযুক্তি লাভ কৰিছিল।ইয়াৰ পূৰ্বে তেওঁ অগ্নিনিৰ্বাপক আৰু জৰুৰীকালীন সেৱাৰ লগতে গৃহৰক্ষী বিভাগৰো মুৰব্বী আছিল।
