ইজৰাইলৰ সেনাই পুনৰ গাজাত নতুন বৃহৎ স্থল সামৰিক অভিযান আৰম্ভ কৰাৰ কথা ঘোষণা কৰিছে। ইফালে, ৰাষ্ট্ৰসংঘই সকীয়াই দিছে যে, যদিহে গাজাৰ যুদ্ধবিধ্বস্ত অঞ্চলত অধিক সাহায্য পোৱা নাযায় তেন্তে অহা ৪৮ ঘণ্টাত ১৪ হাজাৰ শিশুৰ প্ৰাণহানি হ’ব পাৰে।
ইজৰাইলে এতিয়া ১১ সপ্তাহ সম্পূৰ্ণ অৱৰোধৰ অন্তত পেলেষ্টাইনৰ ভূখণ্ডলৈ সীমিত সাহায্যহে প্ৰেৰণ কৰিবলৈ অনুমতি দিছে। এক প্ৰতিবেদন অনুসৰি ৰাষ্ট্ৰসংঘৰ মানৱীয় সাহায্যৰ মুৰব্বী টম ফ্লেচাৰে কয় যে, সোমবাৰে (১৯ মে’, ২০২৫) গাজালৈ পাঁচখন ট্ৰাক সাহায্য প্ৰেৰণ কৰা হৈছে, যিটো জনসংখ্যাৰ হিচাপত বহুত কম। তেওঁ কয় যে, এই সাহায্য এতিয়াও আৰ্তজন সম্প্ৰদায়ৰ ওচৰলৈ যোৱা নাই।
গাজা স্বাস্থ্য মন্ত্ৰালয়ে প্ৰকাশ কৰা অনুসৰি, গাজাত ইজৰাইলে কৰা আক্ৰমণত এতিয়ালৈকে কমেও ৫৩,৫৭৩ জন পেলেষ্টাইনী নিহত হৈছে আৰু ১২১,৬৮৮ জন আহত হৈছে। ইজৰাইলৰ আক্ৰমণত বিগত ২৪ ঘণ্টাত ৮৭ জন লোক নিহত হোৱাৰ লগতে ২৯০ জন আহত হৈছে বুলি মন্ত্ৰালয়ে প্ৰকাশ কৰিছে। স্বাস্থ্য মন্ত্ৰালয়ৰ তথ্য অনুসৰি, ধ্বংসাৱশেষৰ তলত বৰ্তমানেও বহু ভুক্তভোগী আছে, যাৰ ওচৰলৈ এম্বুলেন্স আৰু নিৰাপত্তা বাহিনীয়ে যাব পৰা নাই।
ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে ১৯ মে’ত কয় যে, তেওঁৰ দেশে সমগ্ৰ গাজা নিয়ন্ত্ৰণ কৰিব। আইডিএফে খান ইউনিছ আৰু দক্ষিণ গাজাৰ আশে-পাশে থকা অঞ্চলসমূহ খালী কৰিবলৈ নিৰ্দেশ জাৰি কৰিছে। পেলেষ্টাইনী জনসাধাৰণক অনতিপলমে সেই অঞ্চল এৰি যাবলৈ কোৱা হৈছে।
