বাংলাদেশত সংৰক্ষণৰ বিৰুদ্ধে চলি থকা হিংসাত্মক প্ৰতিবাদত এইপৰ্যন্ত ৩২ গৰাকী লোকৰ মৃত্যু ঘটিছে। বৃহস্পতিবাৰে বৃহত সংখ্যক প্ৰতিবাদকাৰীয়ে ঢাকাস্থিত চৰকাৰী টিভিৰ মুখ্য কাৰ্যালয়ত অগ্নিসংযোগ কৰাৰ লগতে বহু গাড়ী ভাঙি লণ্ড-ভণ্ড কৰে।
উল্লেখ্য যে এদিন পূৰ্বে অৰ্থাত বুধবাৰে বাংলাদেশৰ চৰকাৰী টিভি বিটিবিয়ে প্ৰধানমন্ত্ৰী শ্বেখ হাছিনাৰ সাক্ষাতকাৰ গ্ৰহণ কৰিছিল। বাংলাদেশৰ প্ৰতিবাদকাৰীসকলে সংৰক্ষণৰ অন্ত পেলোৱাৰ দাবীত অটল।
এই হিংসাত্মক পৰিস্থিতিৰ পৰিপ্ৰেক্ষিতত শ্বেখ হাছিনা চৰকাৰে দেশৰ সকলো বিদ্যালয়-বিশ্ববিদ্যালয় অনিৰ্দিষ্টকাললৈ বন্ধ কৰাৰ নিৰ্দেশ দিছে। লগতে পৰিস্থিতি নিয়ন্ত্ৰণৰ বাবে নিৰাপত্তা ব্যৱস্থা কঠোৰ কৰাৰো নিৰ্দেশ প্ৰদান কৰিছে।
উল্লেখ্য যে, স্বাধীনতা লাভ কৰাৰ পিছৰে পৰা বাংলাদেশত প্ৰযোজ্য হৈ আছে সংৰক্ষণ। ইয়াৰ অধীনত স্বাধীনতা সংগ্ৰামীৰ সন্তানৰ বাবে ৩০ শতাংশ, দেশৰ পিছপৰা জিলাৰ যুৱক-যুৱতীসকলৰ বাবে ১০ শতাংশ, মহিলাৰ বাবে ১০ শতাংশ, সংখ্যালঘুৰ বাবে ৫ শতাংশ আৰু বিশেষভাৱে সক্ষম লোকৰ বাবে এক শতাংশ সংৰক্ষণৰ ব্যৱস্থা কৰা হৈছিল। এইদৰে বাংলাদেশত চৰকাৰী চাকৰিৰ ক্ষেত্ৰত ৫৬ শতাংশ সংৰক্ষণ আছিল।
২০১৮ চনত বাংলাদেশৰ যুৱক-যুৱতীসকলে এই সংৰক্ষণৰ বিৰুদ্ধে প্ৰতিবাদ সাব্যস্ত কৰে। কেইবামাহো ধৰি চলা প্ৰতিবাদৰ অন্তত বাংলাদেশ চৰকাৰে সংৰক্ষণৰ অন্ত পেলোৱাৰ কথা ঘোষণা কৰিছিল।
কিন্তু চলিত বৰ্ষৰ ৫ জুনত বাংলাদেশৰ সৰ্বোচ্চ ন্যায়ালয়ে পুনৰ দেশত পুৰণি ব্যৱস্থাৰে সংৰক্ষণ প্ৰযোজ্য কৰাৰ নিৰ্দেশ দিয়ে। সৰ্বোচ্চ ন্যায়ালয়ৰ এই সিদ্ধান্তৰ বিৰুদ্ধে চৰকাৰে আবেদন কৰে যদিও ন্যায়ালয়ে নিজৰ নিৰ্দেশ বাহাল ৰাখে।
ইয়াৰ ফলত ছাত্ৰ-ছাত্ৰীসকল ক্ষুব্ধ হৈ প্ৰতিবাদ কৰিবলৈ আৰম্ভ কৰে। বাংলাদেশৰ বিশ্ববিদ্যালয়ৰ পৰা আৰম্ভ হোৱা এই প্ৰতিবাদ এতিয়া হিংসালৈ পৰিণত হৈছে।
