পঞ্জাৱ ভিজিলেন্স ব্যুৰোৱে বুধবাৰে শিৰোমণি আকালি দলৰ নেতা তথা প্ৰাক্তন মন্ত্ৰী বিক্ৰম সিং মাজিঠিয়াক গ্ৰেপ্তাৰ কৰে। ইয়াৰ পূৰ্বে পঞ্জাৱ ভিজিলেন্সে বিক্ৰম সিঙৰ প্ৰায় ২৫টা স্থানত অভিযান চলাইছিল। ইয়াৰ পিছতে অমৃতসৰৰ ঘৰৰ পৰা তেওঁক গ্ৰেপ্তাৰ কৰা হয়।
এই সন্দৰ্ভত প্ৰাক্তন মন্ত্ৰীগৰাকীৰ পত্নী তথা আকালি দলৰ বিধায়ক গনিভ কৌৰ মাজিঠিয়াই দাবী কৰে যে ভিজিলেন্সৰ ৩০ জনীয়া এটা দল তেওঁলোকৰ ঘৰত প্ৰৱেশ কৰিছিল।
ইফালে গ্ৰেপ্তাৰৰ সময়ৰ ভিডিঅ’ শ্বেয়াৰ কৰি মাজিঠিয়াই ছ’চিয়েল মিডিয়া ছাইট ইনষ্টাগ্ৰামত লিখিছে, ‘মই গুৰু চাহিবৰ পুত্ৰ। মই পঞ্জাৱৰ বিষয়সমূহ উত্থাপন কৰিছো আৰু ভৱিষ্যতেও উত্থাপন কৰি যাম।’
উল্লেখ্য যে, মাজিঠিয়াৰ বিৰুদ্ধে পঞ্জাৱ আৰক্ষীৰ বিশেষ তদন্তকাৰী দলে (এছ আই টি) ২০২১ চনৰ পৰাই ড্ৰাগছ সম্বন্ধীয় গোচৰৰ তদন্ত কৰি আছে। এই গোচৰ সম্বন্ধত আকালি দলৰ নেতাগৰাকীক কেইবাবাৰো সোধা পোচা তথা তলৱ কৰা হৈছিল।
ইফালে চলিত বছৰৰ মাৰ্চ মাহত বিশেষ তদন্তকাৰী দলে দাবী কৰিছিল যে তেওঁলোকে মাজিঠিয়া আৰু তেওঁলোকৰ পৰিয়ালৰ বিৰুদ্ধে সন্দেহজনক বিত্তীয় লেনদেনৰ তথ্য লাভ কৰিছে।
এই সমগ্ৰ ঘটনাৰ পিছতে আজি ভিজিলেন্সে প্ৰাক্তন মন্ত্ৰীগৰাকীক গ্ৰেপ্তাৰ কৰাত সমগ্ৰ আকালি দলৰ নেতা-কৰ্মীৰ মাজত ক্ষোভৰ উদগীৰণ হোৱা পৰিলক্ষিত হৈছে।
