পাকিস্তান সেনাৰ স্পেচিয়েল চাৰ্ভিছ গ্ৰুপৰ শীৰ্ষ বিষয়া মেজৰ মুইজৰ মৃত্যু হোৱাৰ খবৰ পোহৰলৈ আহিছে। সন্ত্ৰাসবাদী সংগঠন টিটিপিয়ে দক্ষিণ বজীৰিস্তানত মেজৰ মুইজক হত্যা কৰা বুলি দাবী কৰিছে।
মৃত্যুৰ খবৰ প্ৰকাশ পোৱা এইগৰাকীয়ে সেই শীৰ্ষ বিষয়া, যিজনে ২০১৯ চনত ফেব্ৰুৱাৰীত ভাৰতীয় বায়ু সেনাৰ পাইলট উইং কমাণ্ডাৰ অভিনন্দনক কৰায়ত্ত কৰা বুলি দাবী কৰিছিল।
পাকিস্তানৰ ভূমিত ভূপতিত হোৱা ভাৰতীয় বায়ু সেনাৰ ফাইটাৰ জেটৰ পাইলট উইং কমাণ্ডাৰ অভিনন্দনক মেজৰ মুইজ আব্বাছে কৰায়ত্ত কৰা বুলি দাবী কৰাৰ পিছতে তেওঁৰ নামটো যথেষ্ট চৰ্চালৈ আহিছিল। ইয়াৰ উপৰি বিভিন্ন মাধ্যমত দিয়া কেইবাটাও সাক্ষাতকাৰত তেওঁ নিজেও এই দাবী তথা কথা উল্লেখ কৰিছিল।
পাকিস্তানী সংবাদ মাধ্যমৰ খবৰ অনুসৰি, খাইবাৰ পখতুনখোৱাৰ দক্ষিণ ৱজীৰিস্তান জিলাত চোৰাংচোৱা অভিযানৰ সময়তে মুইজৰ মৃত্যু হয়।
উল্লেখ্য যে, ২০১৯ চনৰ ফেব্ৰুৱাৰী মাহত বালাকোট এয়াৰ ষ্ট্ৰাইকৰ সময়ত পাকিস্তানৰ সৈতে হোৱা বিমান সংঘৰ্ষৰ সময়ত অভিনন্দনে শত্ৰুৰ যুঁজাৰু বিমানৰ সৈতে শক্তিশালীভাৱে যুঁজ দিছিল। শত্ৰু পক্ষৰ সৈতে যুঁজ দিয়াৰ সময়তে তেওঁৰ মিগ ২১ বিমানখন ভূপতিত হৈছিল আৰু যাৰ পিছত তেওঁক পাকিস্তানে বন্দী কৰে।
চুবুৰীয়া দেশখনে তিনিদিন কৰায়ত্ত কৰি ৰখাৰ পিছত অভিনন্দন নিৰাপদে স্বদেশলৈ উভতি আহিছিল। সেই সময়ত অভিনন্দন আছিল উইং কমাণ্ডাৰ।
