ৰাজ্যত উদ্বেগজনকভাৱে বৃদ্ধি পাইছে জাপানীজ এনকেফেলাইটিছ ৰোগীৰ সংখ্যা। এই ৰোগৰ সংখ্যা বৃদ্ধি পোৱাৰ ফলত সমগ্ৰ ৰাজ্যতে স্বাস্থ্য কৰ্তৃপক্ষই জৰুৰী সতৰ্কতা অৱলম্বন কৰিছে।
শেহতীয়াকৈ ৰাজ্য চৰকাৰৰ স্বাস্থ্য বিভাগৰ তৰফৰ পৰা জানিব পৰা অনুসৰি, আজিৰ দিনটোলৈকে ৩২ গৰাকী লোক এই ৰোগত আক্ৰান্ত হৈ গুৱাহাটী মেডিকেল কলেজ হাস্পতালত ভৰ্তি হৈ আছে।
এই ৰোগৰ ফলত এতিয়ালৈকে ৪ জন লোকৰ মৃত্যু হোৱা বুলিও তথ্যত প্ৰকাশ পাইছে। মৃতসকলৰ ভিতৰত আছে তিনিটা শিশু আৰু এজন ৮১ বছৰীয়া বৃদ্ধ।
৩২ গৰাকী আক্ৰান্তৰ ভিতৰত সৰ্বাধিক ১২জন লোক কামৰূপ জিলাৰ, ৮ জন নলবাৰীৰ, ৫ জন দৰঙৰ, বজালীৰ দুজন আৰু মৰিগাঁও, ধুবুৰী, নগাঁও জিলাৰ এজন এজন। জি এম চি এইচত ভৰ্তি হৈ থকা আন এগৰাকী আক্ৰান্ত লোক মেঘালয়ৰ বুলিও জানিব দিয়ে জি এম চি এইচৰ অধ্যক্ষ অচ্যুত বৈশ্যই।
জাপানীজ এনকেফেলাইটিছত আক্ৰান্ত হৈ মৃত্যুবৰণ কৰা ৰোগীকেইজন ক্ৰমে বজালী, বাইহাটা চাৰিআলী, নলবাৰী আৰু নগাঁৱৰ।
জি এম চি এইচৰ বিষয়াই জানিব দিয়া অনুসৰি ৰাজ্যত বিগত এপ্ৰিল মাহৰ পৰাই বৃদ্ধি পাইছে এই সংক্ৰমণ। অৱশ্যে জুন মাহতহে মৃত্যু হৈছে চাৰিওজন ৰোগীৰ।
গাহৰি আৰু ধাননি পথাৰ থকা অঞ্চলৰ পৰা এই ৰোগৰ সংক্ৰমণ হোৱা বুলিও জানিবলৈ দিছে জি এম চি এইচ কৰ্তৃপক্ষই।
এই ৰোগৰ লক্ষণ
ৰোগীৰ দেহত প্ৰথম অৱস্থাত প্ৰচণ্ড জ্বৰ, ডিঙিৰ বিষ, মূৰৰ বিষৰ লক্ষণ দেখা দিয়ে। এনেবোৰ লক্ষণ দেখা দিলেই চিকিৎসকৰ পৰামৰ্শ গ্ৰহণ কৰিব।
প্ৰথম অৱস্থাত চিকিৎসা গ্ৰহণ কৰিলে সোনকালে সুস্থ হয়। অৱশ্যে পলমকৈ চিকিসকৰ কাষ চাপিলে কিছু অসুবিধাৰ সৃষ্টি হয়।
এই সন্দৰ্ভত সকলোকে সজাগ হৈ থাকিবলৈ পৰামৰ্শ প্ৰদান কৰিছে জি এম চি এইচৰ অধ্যক্ষ ডাঃ অচ্যুত বৈশ্যই।
