বিগত তিনি বছৰ ধৰি ৰাছিয়া আৰু ইউক্ৰেইনৰ মাজত চলি থকা যুদ্ধই পুনৰ লৈছে ভয়ংকৰ ৰূপ। দেওবাৰে পুটিনৰ সৈন্য বাহিনীয়ে ইউক্ৰেইনত চলাই ভয়ংকৰ আক্ৰমণ। ৰাছিয়াৰ সেনা বাহিনীৰ আক্ৰমণত ইউক্ৰেইনৰ এখন F-16 ফাইটাৰ জেট সম্পূৰ্ণৰূপে ধ্বংস হোৱাৰ লগতে এজন পাইলটৰো মৃত্যু হয়।
জানিব পৰা অনুসৰি, শনিবাৰে পুৱতি নিশা ৰাছিয়াই ৫০০ৰো অধিক ড্ৰোণ আৰু মিছাইলেৰে ইউক্ৰেইনত আক্ৰমণ চলায়। এই আক্ৰমণৰ ফলত পশ্চিম, দক্ষিণ আৰু মধ্য ইউক্ৰেইনৰ কেইবাটাও অঞ্চল একপ্ৰকাৰ ধ্বংসস্তুপত পৰিণত হয়।
এই আক্ৰমণক যুদ্ধৰ আৰম্ভণিৰ পৰা ৰাছিয়াৰ আটাইতকৈ শক্তিশালী বোমা বিস্ফোৰণ অভিযান হিচাপে গণ্য কৰা হৈছে।
ইউক্ৰেইনৰ বায়ুসেনাই জনোৱা মতে, তেওঁলোকে ৪৭৭টা ড্ৰ’ণ আৰু ৬০টা ক্ষেপণাস্ত্ৰৰ মুখামুখি হৈছিল। ইয়াৰে ২৪৯ খন ড্ৰ’ণ ভূপতিত কৰা হয় আৰু ২২৬ খন ইলেক্ট্ৰনিক জামিঙৰ জৰিয়তে নিষ্ক্ৰিয় কৰা হয়।
ইয়াৰ উপৰি ইউক্ৰেইনৰ বায়ু সেনাই নিশ্চিত কৰে যে ৰাছিয়াৰ আক্ৰমণ প্ৰতিহত কৰাৰ প্ৰচেষ্টাত এখন F-16 সম্পূৰ্ণৰূপে ধ্বংস হৈ যায় আৰু এজন পাইলটৰ মৃত্যু হয়।
