শুকুৰবাৰৰ নিশা ৰাছিয়াৰ সেনা বাহিনীয়ে ইউক্ৰেইনৰ ওপৰত পুনৰ সংঘটিত কৰে ভয়ংকৰ আক্ৰমণ। ৫৯৭টা ড্ৰ’ন আৰু ২৬টা ক্ষেপণাস্ত্ৰ নিক্ষেপ কৰি এই আক্ৰমণ সংঘটিত কৰা বুলি ইউক্ৰেইনৰ ৰাষ্ট্ৰপতি ভ’ল’ডিমিৰ জেলেনস্কিয়ে।
জেলেনস্কিয়ে লগতে কয় যে শেহতীয়া সময়ত ইউক্ৰেইনৰ ওপৰত ৰাছিয়াৰ এইটোৱেই আটাইতকৈ ডাঙৰ আক্ৰমণ। জেলেনস্কিৰ মতে, এই ড্ৰোনসমূহৰ অধিকাংশই আছিল ‘শ্বাহেদ’ ড্ৰ’ন, যিবোৰ ইৰাণত নিৰ্মিত।
এই আক্ৰমণৰ পিছতে তেওঁ এনে ধৰণৰ আক্ৰমণ ৰোধ কৰিবলৈ ৰাছিয়াৰ ওপৰত কঠোৰ নিষেধাজ্ঞা আৰোপ কৰিবলৈ বিশ্ববাসীক আহ্বান জনায়।
ইউক্ৰেইনৰ বায়ুসেনাই জনোৱা মতে, তেওঁলোকে ৩১৯খন ড্ৰ’ন আৰু ২৫টা ক্ষেপণাস্ত্ৰ ধ্বংস কৰে। কিন্তু প্ৰায় ২০ খন ড্ৰোন আৰু এটা মিছাইলে ইউক্ৰেইনৰ পাঁচটা স্থানত ক্ষতিসাধন কৰে। অৱশ্যে এই পাঁচটা স্থান কোন কোন সেই কথা প্ৰকাশ কৰা নাই বায়ুসেনাই।
জেলেনস্কিয়ে পশ্চিমীয়া দেশসমূহক এতিয়া কেৱল সতৰ্কবাণী দিয়াই নহয়, ৰাছিয়াক বাধা দিয়াৰ বাবে তাৎক্ষণিক আৰু সুনিৰ্দিষ্ট সিদ্ধান্ত ল’বলৈ আহ্বান জনায়।
তেওঁ কয় যে ৰাছিয়াৰ এনে বিমান আক্ৰমণৰ গতি বন্ধ কৰাটো সম্ভৱ, যদিহে সময়ত কঠোৰ নিষেধাজ্ঞা আৰোপ কৰা হয়।
