ভাৰতৰ বৃহত্তম ফুটবল লীগ ইণ্ডিয়ান ছুপাৰ লীগ চমুকৈ আই এছ এলৰ পৰৱৰ্তী ছিজন অনিশ্চিতকালীন সময়ৰ বাবে স্থগিত ৰাখিছে। ফুটবল স্প’ৰ্টছ ডেভেলপমেণ্ট লিমিটেডে (এফ এছ ডি এল) শুকুৰবাৰে সকলো ক্লাবলৈ পত্ৰ প্ৰেৰণ কৰি এই কথা জনাই দিছে।
এফ এছ ডি এলৰ তৰফৰ পৰা কোৱা হৈছে যে তেওঁলোকৰ সৈতে সৰ্বভাৰতীয় ফুটবল ফেডাৰেশ্যনে স্বাক্ষৰ কৰা মাষ্টাৰ্ছ এগ্ৰীমেণ্ট অহা ৮ ডিচেম্বৰত সমাপ্ত হ’ব।
নতুন চুক্তি সম্পাদন সন্দৰ্ভত ফুটবল ফেডাৰেশ্যনৰ সৈতে আলোচনা আৰম্ভ হ’লেও এই সন্দৰ্ভত এই পৰ্যন্ত কোনো সমাধান সূত্ৰ ওলোৱা নাই।
যিহেতু ডিচেম্বৰৰ পাছত ফুটবল ফেডাৰেশ্যনৰ সৈতে চুক্তি নাথাকিব, সেইবাবে ২০২৫-২৬ ছীজনত আই এছ এলৰ প্ৰকল্পনা, আয়োজন অথবা বাণিজ্যিকৰণৰ ক্ষেত্ৰত এফ এছ ডি এল অপাৰগ। এনে স্থিতিত ছীজনটো আগুৱাই নিয়াৰ স্থিতিত নাই এফ এছ ডি এল।
উল্লেখ্য যে নতুন চুক্তি সন্দৰ্ভত কোনো স্পষ্ট ব্যাখ্যা নোপোৱা পৰ্যন্ত টুৰ্ণামেণ্টখন স্থগিত ৰখাৰ সিদ্ধান্ত গ্ৰহণ কৰিছে। ২০১০ চনত ১৫ বছৰৰ বাবে এফ এছ ডি এলৰ সৈতে চুক্তি হৈছিল সৰ্বভাৰতীয় ফুটবল ফেডাৰেশ্যনে। এই চুক্তি অনুসৰি ফুটবল ফেডাৰেশ্যনে প্ৰতি বছৰে লাভ কৰে ৫০ কোটি টকা।
লাভ কৰা তথ্য অনুসৰি উচ্চতম ন্যায়ালয়ৰ পৰা অনুমতি নোপোৱা পৰ্যন্ত ফুটবল ফেডাৰেশ্যন আৰু এফ এছ ডি এলৰ মাজত মাষ্টাৰ্ছ ৰাইটছ এগ্ৰীমেণ্ট হোৱাৰ কোনো সম্ভাৱনা নাই।
ভাৰতত ফুটবলৰ উত্তৰণৰ বাবে ২০২৪ চনত প্ৰথমবাৰৰ বাবে আৰম্ভ হৈছিল আই এছ এল। এই প্ৰতিযোগিতাখনৰ জৰিয়তে এতিয়ালৈকে বহু খেলুৱৈয়ে চমকপ্ৰদ প্ৰদৰ্শন আগবঢ়াই অনুৰাগীৰ হৃদয় জিনাৰ লগতে আৰ্থিকভাৱেও যথেষ্ট লাভাম্বিত হৈছিল।
