ভাৰতীয় ফুটবল দলৰ প্ৰাক্তন অধিনায়ক তথা শীৰ্ষ ষ্ট্ৰাইকাৰ সুনীল ছেত্ৰীয়ে বুধবাৰে ভাৰতীয় ফুটবলৰ বৰ্তমানৰ অনিশ্চয়তাৰ অৱস্থা অতি চিন্তনীয় আৰু শীৰ্ষ পৰ্যায়ৰ ফুটবল প্ৰতিযোগিতা ইণ্ডিয়ান ছুপাৰ লীগ (আই এছ এল) অনিৰ্দিষ্টকাললৈ স্থগিত ৰখাৰ ফলত ক্ৰীড়া জগত চিন্তিত, দুঃখিত আৰু বেদনাদায়ক বুলি মন্তব্য কৰিছে।
আগশাৰীৰ লীগখনত বেংগালুৰু এফ চিৰ হৈ খেলা ছেত্ৰীয়ে কয় যে প্ৰতিযোগিতাখনৰ ভৱিষ্যতক লৈ আশংকা প্ৰকাশ কৰি বহু লোকে তেওঁলৈ অজস্ৰ ফোন আৰু মেছেজ কৰিছে।
৪০ বছৰীয়া খেলুৱৈগৰাকীয়ে এক্সত লিখিছে, ‘প্ৰথমে মোৰ এইটো চিন্তা আহিছিল যে মোৰ খেলিবলৈ বাকী থকা সময়খিনি মই কেনেকৈ কটাম। কিন্তু বিভিন্ন ক্লাবৰ খেলুৱৈৰ সৈতে কথা পতাৰ পিছত মই বুজিলোঁ যে মোৰ সমস্যাটো ইমান গুৰুত্বপূৰ্ণ নহয়।’
ছেত্ৰীয়ে কয়, ‘ভাৰতীয় ফুটবলৰ বৰ্তমানৰ পৰিস্থিতি অতি চিন্তনীয়। কেৱল মোৰ ক্লাবৰ পৰাই নহয়, আন ক্লাবৰ হৈ খেলা খেলুৱৈ, কৰ্মচাৰী, ফিজিঅ’ৰ লগতে আন বহুতৰ পৰাই মই বিভিন্ন বাৰ্তা লাভ কৰিছো।’
তেওঁ কয়, ‘ভাৰতীয় ফুটবল পৰিৱেশ তন্ত্ৰত বৰ্তমান প্ৰচলিত অনিশ্চয়তাৰ বাবে সকলোৱে চিন্তিত, দুঃখিত আৰু ভয় খাইছে।’
উল্লেখ্য যে, ফুটবল স্প’ৰ্টছ ডেভেলপমেণ্ট লিমিটেড (এফ এছ ডি এল) আৰু সৰ্বভাৰতীয় ফুটবল ফেডাৰেশ্যনে স্বাক্ষৰ কৰা মাষ্টাৰ্ছ এগ্ৰীমেণ্ট অহা ৮ ডিচেম্বৰত সমাপ্ত হ’ব। যিহেতু ডিচেম্বৰৰ পাছত ফুটবল ফেডাৰেশ্যনৰ সৈতে চুক্তি নাথাকিব, সেইবাবে ২০২৫-২৬ ছীজনত আই এছ এলৰ প্ৰকল্পনা, আয়োজন অথবা বাণিজ্যিকৰণৰ ক্ষেত্ৰত এফ এছ ডি এল অপাৰগ। এনে স্থিতিত ছীজনটো আগুৱাই নিয়াৰ স্থিতিত নাই এফ এছ ডি এল।
