টোপনিৰ পৰা সাৰ পাব বুলি ২০ বছৰ অপেক্ষাৰত আছিল এটা ৰাজপৰিয়াল। কিন্তু, টোপনি নাভাঙিল ছৌদি আৰবৰ সেই ৰাজপৰিয়ালৰ ৰাজকুমাৰজনৰ। এটি পথ দুৰ্ঘটনাৰ বাবে কোমাত যোৱা প্ৰিন্স আল ৱালিদ বিন খালেদ বিন তালালে বিগত ২০ বছৰ ধৰি আছিল লাইফ ছাপোৰ্টত।
২০ বছৰীয়া এখন দীঘলীয়া যুঁজ আৰু পৰিলায়ৰ আপ্ৰাণ চেষ্টাৰ পিছতো প্ৰাণ ৰক্ষা নপৰিল প্ৰিন্স আল ৱালিদৰ। গ্ল’বেল ইমামছ কাউন্সিলে ১৯ জুলাইত এক বিবৃতিত তেওঁৰ মৃত্যুৰ কথা ঘোষণা কৰিছিল। মৃত্যুৰ সময়ত তেওঁৰ বয়স আছিল ৩৬ বছৰ। ৰাজকুমাৰ খালেদ বিন তালাল আল ছাউদৰ জ্যেষ্ঠ পুত্ৰ আৰু কোটিপতি ব্যৱসায়ী ৰাজকুমাৰ আলৱালিদ বিন তালালৰ ভতিজা।
উল্লেখ্য যে, ২০০৫ চনত লণ্ডনত অধ্যয়ন কৰি থকা অৱস্থাত এক গুৰুতৰ গাড়ী দুৰ্ঘটনাত পতিত হৈছিল ৰাজকুমাৰ আল ৱালিদ। এই দুৰ্ঘটনাত তেওঁ মগজুত বেয়াকৈ আঘাত পাইছিল আৰু কোমাত গুচি গৈছিল। সেই সময়ত তেওঁৰ বয়স আছিল মাত্ৰ ১৫ বছৰ।
‘স্লিপিং প্ৰিন্স’ৰ বাবে বিশ্বৰ শ্ৰেষ্ঠ আমেৰিকান আৰু স্পেনিছ স্নায়ু বিশেষজ্ঞৰ পৰামৰ্শ লোৱা হৈছিল যদিও কোনেও তেওঁক সুস্থ অৱস্থালৈ ঘূৰাই আনিব পৰা নাছিল।
প্ৰিন্সৰ মৃত্যুৰ খবৰ বিয়পি পৰাৰ লগে লগে ছ’চিয়েল মিডিয়াত ট্ৰেণ্ডিং হ’বলৈ আৰম্ভ কৰে #SleepingPrince। এই দুখৰ মুহূৰ্তত হাজাৰ হাজাৰ লোকে শ্ৰদ্ধাঞ্জলি জ্ঞাপন কৰে।
এজন ব্যৱহাৰকাৰীয়ে লিখিছে যে ২০ বছৰ ধৰি তেওঁ সাহস নেহেৰুৱাই, আশা আৰু প্ৰেমৰ জীৱন্ত নিদৰ্শন হৈয়েই থাকিল, বিদায় স্লিপিং প্ৰিন্স। এয়া কেৱল এজন ব্যক্তিৰ কাহিনী নহয়, পিতৃৰ অদম্য প্ৰেম আৰু বিশ্বাসৰ কাহিনী।
