পাকিস্তানৰ অশান্ত অঞ্চল খাইবাৰ পখতুনখোৱা প্ৰদেশৰ লক্কি মাৰৱাট জিলাত শনিবাৰে সংঘটিত হয় এক ভয়ংকৰ বিস্ফোৰণ। এটা পুৰণি মৰ্টাৰ শ্বেল বিস্ফোৰণৰ ফলত ৫টি শিশু নিহত হোৱাৰ লগতে আন ১২টি শিশু গুৰুতৰভাৱে আহত হয়। পাকিস্তান আৰক্ষীয়ে প্ৰদান কৰিছে এই তথ্য।
জানিব পৰা অনুসৰি, এটি শিশুৰ দলে পাহাৰীয়া অঞ্চলত বিস্ফোৰণ নোহোৱা মৰ্টাৰৰ গোলা এটা উদ্ধাৰ কৰি নিজৰ গাঁৱলৈ লৈ আহে। পিছত শিশুকেইটাই বোমাটো লৈ খেলিবলৈ আৰম্ভ কৰাত হঠাতে মৰ্টাৰটো বিস্ফোৰণ ঘটে। বিস্ফোৰণত থিতাতে মৃত্যু হয় ৫টা শিশুৰ। আনহাতে এই বিস্ফোৰণ ফলত আন ১২ জন শিশুও আহত হয়।
এই বিস্ফোৰণৰ খবৰ লাভ কৰাৰ লগে লগে ঘটনাস্থলত স্থানীয় আৰক্ষী আৰু উদ্ধাৰকাৰী দল উপস্থিত হৈ মৃত আৰু আহতসকলক উদ্ধাৰ কৰি ওচৰৰে এখন হাস্পতালত ভৰ্তি কৰোৱা হয়।
ইফালে হাস্পতাল কৰ্তৃপক্ষই জানিব দিয়া অনুসৰি, বিস্ফোৰণত আহত হোৱা কেইবাটাও শিশুৰ স্বাস্থ্যৰ অৱস্থা সংকটজনক। সম্প্ৰতি এই বিস্ফোৰণক লৈ অঞ্চলটোত এক আতংকময় পৰিৱেশে বিৰাজ কৰি আছে।
