হিংসাপীড়িত বাংলাদেশত আৰম্ভ কৰা হ’ল মোবাইল-ইণ্টাৰনেট সেৱা। ১৮ জুলাইত দেশজুৰি হোৱা হিংসাবৃদ্ধিৰ পাছত চৰকাৰে বন্ধ কৰি দিছিল মোবাইল-ইণ্টাৰনেট সেৱা।
প্ৰতিবেদন অনুসৰি, দেশৰ সাম্প্ৰতিক সংকটৰ পৰিপ্ৰেক্ষিতত আৰু ছ’চিয়েল মিডিয়াত ভুৱা বাতৰিৰ প্ৰচাৰ প্ৰতিহত কৰিবলৈ এনেধৰ সিদ্ধান্ত গ্ৰহণ কৰিছিল চৰকাৰে।
চৰকাৰী চাকৰিত সংৰক্ষণ ব্যৱস্থাৰ সংস্কাৰক লৈ দেশত হোৱা হিংসাত্মক ঘটনাৰ মাজতে ছ’চিয়েল মিডিয়াত প্ৰচাৰ হোৱা ভুৱা বাতৰি প্ৰতিহত কৰিবলৈ নিষিদ্ধ কৰা হৈছিল মোবাইল ইণ্টাৰনেট সেৱা। অৱশ্যে, ১০ দিনৰ পিছত দেওবাৰে পুনৰ আৰম্ভ কৰা হয় মোবাইল ইণ্টাৰনেট সেৱা।
ইফালে তথ্য আৰু যোগাযোগ প্ৰযুক্তিৰ ৰাজ্যিক মন্ত্ৰী (আইচিটি) জুনেইদ আহমেদ পালকে ঘোষণা কৰে যে, এই সেৱাসমূহ পুনৰুদ্ধাৰ হোৱাৰ পাছত তিনি দিনৰ বাবে সকলো ব্যৱহাৰকাৰীক প্ৰদান কৰা হ’ব ৫ জিবি বিনামূলীয়া ইণ্টাৰনেট। স্থানীয় সময় অনুসৰি, আবেলি প্ৰায় ৩ বজাত পুনৰুদ্ধাৰ কৰা হয় এই মোবাইল ইণ্টাৰনেট সেৱা।
লগতে ছ’চিয়েল মিডিয়া প্লেটফৰ্মৰ ব্যৱহাৰ সন্দৰ্ভত পালকে কয়, বাংলাদেশ টেলিকমিউনিকেচন ৰেগুলেটৰী কমিছনে(বিটিআৰচি) ফেচবুক, টিকটক আৰু ইউটিউবকে ধৰি ছ’চিয়েল মিডিয়া প্লেটফৰ্মৰ কৰ্তৃপক্ষলৈও ইতিমধ্যে পত্ৰ প্ৰেৰণ কৰিছে যাতে হিংসাত্মক পোষ্টৰ আপলোডৰ বিৰুদ্ধে সতৰ্কতা অৱলম্বন কৰে।
উল্লেখ্য যে, দেশজুৰি হোৱা এই হিংসাত্মক ঘটনাৰ পাছতেই বন্ধ কৰি দিয়া হৈছিল ইণ্টাৰনেট আৰু মোবাইল সেৱা। স্থানীয় বাতৰি কাকতৰ প্ৰতিবেদন অনুসৰি, এই হিংসাত্মক ঘটনাত ইতিমধ্যে মৃত্যু হৈছে ১০০ ৰো অধিক লোকৰ।
অৱশ্যে, মৃত্যুৰ বিষয়ে উপলব্ধ হোৱা নাই কোনো আনুষ্ঠানিক তথ্য। প্ৰধানমন্ত্ৰী শ্বেখ হাছিনাই হিংসাত্মক ঘটনাৰ পিছত কাৰ্ফিউ নিৰ্দেশ দিয়াৰ সিদ্ধান্তৰ সপক্ষে কয় যে, মানুহৰ জীৱন আৰু সম্পত্তিৰ সুৰক্ষা নিশ্চিত কৰাৰ বাবে গ্ৰহণ কৰা হৈছে এই কঠোৰ ব্যৱস্থা। অৱশ্যে, পাছলৈ স্বাভাৱিক হৈ পৰে বাংলাদেশৰ এই পৰিস্থিতি।
