বিগত বৰ্ষত বাংলাদেশত হোৱা অভ্যুত্থানৰ পিছত এতিয়া ঘোষণা কৰা হৈছে নিৰ্বাচনৰ দিন। বাংলাদেশৰ মুখ্য নিৰ্বাচন আয়ুক্ত এ এম এম নাছিৰ উদ্দিনে ১১ ডিচেম্বৰত ঘোষণা কৰে যে ২০২৬ চনৰ ১২ ফেব্ৰুৱাৰীত ত্ৰয়োদশ ৰাষ্ট্ৰীয় বিধানসভাৰ নিৰ্বাচন অনুষ্ঠিত হ’ব। ইয়াৰ ফলত বাংলাদেশত মহম্মদ ইউনুছ চৰকাৰৰ কাৰ্যকাল বৃদ্ধিৰ জল্পনা-কল্পনাৰ অন্ত পৰে।
২০২৪ চনৰ আগষ্ট মাহত ছাত্ৰ-ছাত্ৰী নেতৃত্বাধীন হিংসাত্মক প্ৰতিবাদৰ পিছত প্ৰধানমন্ত্ৰী শ্বেখ হাছিনাক ক্ষমতাৰ পৰা উচ্ছেদ কৰাৰ পিছত এইটোৱেই হ’ব প্ৰথম নিৰ্বাচন। অৱশ্যে বাংলাদেশৰ সাধাৰণ নিৰ্বাচনত অংশগ্ৰহণ কৰিব নোৱাৰিব শ্বেখ হাছিনাৰ দল আৱামী লীগে। বাংলাদেশত নিষেধাজ্ঞা আৱামি লীগৰ। ফলস্বৰূপে মূল প্ৰতিদ্বন্দ্বিতা হ’ব প্ৰাক্তন প্ৰধানমন্ত্ৰী খালেদা জিয়াৰ দল বিএনপি আৰু মৌলবাদী সংগঠন জামাত-ই-বাংলাদেশৰ মাজত। নিৰ্বাচন আয়োগৰ তথ্য অনুসৰি, ভোটদানৰ প্ৰস্তুতি প্ৰায় সম্পূৰ্ণ হৈছিল, মাত্ৰ সময়সূচীহে বাকী আছিল।
বাংলাদেশৰ মুখ্য নিৰ্বাচন আয়ুক্তৰ মতে, সাধাৰণ নিৰ্বাচনৰ বাবে মনোনয়ন দাখিলৰ শেষ তাৰিখ ২০২৫ চনৰ ২৯ ডিচেম্বৰ। জনবিদ্ৰোহৰ পিছত নতুন বাংলাদেশ গঢ়াৰ এক ঐতিহাসিক সুযোগ হিচাপে নিৰ্বাচনক আখ্যা দিয়ে। তেওঁ কয় যে ইয়াক ন্যায্য আৰু বিশ্বাসযোগ্যভাৱে পৰিচালনা কৰিব লাগে।
ভাষণত মুখ্য নিৰ্বাচন আয়ুক্তগৰাকীয়ে ভোটাৰসকলক নিৰ্ভয়ে ভোটাধিকাৰ সাব্যস্ত কৰিবলৈ আহ্বান জনায়। নিৰ্বাচনী প্ৰক্ৰিয়া আনুষ্ঠানিকভাৱে আৰম্ভ হয় সূচী ঘোষণাৰ পৰা। ইয়াৰ লগে লগে ৰিটাৰ্ণিং অফিচাৰ (আৰ অ’) আৰু সহকাৰী ৰিটাৰ্নিং বিষয়া (এ আৰ অ’) নিযুক্তিৰ ঘোষণা কৰা হয়। আচৰণ বিধি অনুসৰি ভোটগ্ৰহণৰ দিনটোৰ ২১ দিন পূৰ্বে নিৰ্বাচনী প্ৰচাৰ আৰম্ভ হ’ব পাৰে। কাৰ্যসূচী ঘোষণাৰ ৪৮ ঘণ্টাৰ ভিতৰত ৰাজহুৱা স্থানৰ পৰা পোষ্টাৰ, প্লেকাৰ্ড, বেনাৰ, বিলবোৰ্ড আঁতৰাই পেলাবলৈ প্ৰাৰ্থীসকলক নিৰ্দেশ দিয়া হৈছে।
