বাংলাদেশৰ সাধাৰণ নিৰ্বাচনত বহুসময়ত ভাৰত বিৰোধী মন্তব্য কৰা মৌলবী মামুনুল হকে হেৰুৱায় নিজৰ আসন। বাংলাদেশৰ খিলাফত মাজলিছৰ প্ৰাৰ্থী মামুনুল হকে ঢাকাৰ ১৩খন আসনত পৰাস্ত হয়। এই আসনত বিএনপিৰ ববি হাজ্জাজে জয়লাভ কৰে।
বাংলাদেশৰ স্বাধীনতা দিৱস উপলক্ষে ২০২১ চনৰ ২৬ মাৰ্চত বাংলাদেশ ভ্ৰমণ কৰিছিল প্ৰধানমন্ত্ৰী নৰেন্দ্ৰ মোদীয়ে। তেওঁৰ এই ভ্ৰমণৰ সময়ত উগ্ৰ মুছলমান সংগঠন হিফাজাত-ই-ইছলামে কেইবাটাও স্থানত প্ৰতিবাদৰ আয়োজন কৰে। এই পৰিস্থিতি ইমানেই হিংস্ৰ আছিল যে সেই সংঘৰ্ষত কেইবাজনো লোকৰ মৃত্যু হয়। হিংসাৰ উচটনি দিয়াৰ অভিযোগত সংগঠনটোৰ যুটীয়া সাধাৰণ সম্পাদক মামুনুল হকক আৰক্ষীয়ে গ্ৰেপ্তাৰ কৰে।
শ্বেখ হাছিনাৰ কাৰ্যকালত হিংসাৰ উচটনি দিয়াকে ধৰি কেইবাটাও অভিযোগত গ্ৰেপ্তাৰ হৈছিল মামুনুল হকক। সেই সময়ত চৰকাৰে তেওঁৰ বিৰুদ্ধে কঠোৰ ব্যৱস্থা গ্ৰহণ কৰিছিল। বিগত মাহত চৰকাৰ বিৰোধী প্ৰতিবাদৰ পিছত শ্বেখ হাছিনাই পদত্যাগ কৰি দেশ এৰি যোৱাৰ পিছত গঠন হোৱা অন্তৱৰ্তীকালীন চৰকাৰখনে মামুনুল হক আৰু আন একাংশ উগ্ৰ নেতাক মুকলি কৰি দিয়ে।
হিফাজাত-ই-ইছলাম ২০১০ চনত গঠন কৰা হৈছিল। ২০১০ চনত প্ৰতিষ্ঠা হোৱা হিফাজাত-ই-ইছলাম এই সংগঠনে কঠোৰ ইছলামিক মতাদৰ্শক সমৰ্থন কৰে। সংবিধান আৰু সমাজৰ পৰিৱৰ্তনৰ বিৰুদ্ধে বাৰে বাৰে মাত মাতি আহিছে এই সংগঠনটোৱে। মাদ্ৰাছা আৰু ইয়াৰ ইছলামিক ব্যৱস্থাৰ কাম-কাজত ভূমিকা লোৱাৰ বাবেও সংগঠনটোৱে বাতৰিৰ শিৰোনাম দখল কৰিছে। মামুনুল হক এই সংগঠনটোৰ অন্যতম বিশিষ্ট ব্যক্তি হিচাপে পৰিগণিত হৈছে। তেওঁৰ নিজৰ প্ৰৰোচনামূলক ভাষণ আৰু উগ্ৰ মতামতৰ বাবে সমৰ্থক আৰু বিৰোধী উভয়ৰে মাজত চৰ্চাৰ বিষয় হৈ পৰিছে।
ইফালে বাংলাদেশ নিৰ্বাচন আয়োগে ত্ৰয়োদশ ৰাষ্ট্ৰীয় সংসদ নিৰ্বাচনত তিনিটা সমষ্টিৰ ফলাফল পিছুৱাই দিয়াৰ সিদ্ধান্ত গ্ৰহণ কৰিছে। এই সমষ্টিসমূহ হ’ল শ্বেৰপুৰ-২, চট্টগং-২, আৰু চট্টগং-৪। নিৰ্বাচন আয়োগৰ সচিবালয়ৰ জ্যেষ্ঠ সহকাৰী সম্পাদক মহম্মদ শ্বাহিদুল ইছলামে উল্লেখ কৰে যে বিজয়ী প্ৰাৰ্থীৰ সৈতে জড়িত আইনী সমস্যাৰ বাবে এই সমষ্টিসমূহৰ ফলাফল বন্ধ ৰখা হৈছে।
