ইৰাণ যুদ্ধই ডুবাইৰ ভৱিষ্যতৰ ওপৰত গভীৰ আৰু গুৰুতৰ প্ৰভাৱ পেলাইছে। ডুবাইৰ অৰ্থনীতি তেলৰ ওপৰত নহয়, পৰ্যটন, বিমান ভ্ৰমণ, ৰিয়েল এষ্টেট, বেংকিং, আন্তঃৰাষ্ট্ৰীয় বিনিয়োগৰ ওপৰতহে বেছি নিৰ্ভৰশীল। যুদ্ধৰ তৃতীয় সপ্তাহত ইতিমধ্যে ডুবাইৰ নিৰাপদ আৰু বিলাসী কেন্দ্ৰ হিচাপে ভাবমূৰ্তি ক্ষতিগ্ৰস্ত হৈছে, যিটো ক্ষতি দীৰ্ঘদিনলৈ থাকিব পাৰে। ডুবাইৰ ৯৫% অৰ্থনীতি তেলৰ বাহিৰত ভিত্তি কৰি গঢ় লৈ উঠিছে।
ডুবাইৰ পৰ্যটন উদ্যোগে বছৰি প্ৰায় ৩০ বিলিয়ন ডলাৰ উপাৰ্জন কৰে যদিও যুদ্ধৰ ফলত যথেষ্ট লোকচান হৈছে। প্ৰথম অৱস্থাত লাভজনকতাৰ প্ৰক্ষেপণে এতিয়া বৃদ্ধিৰ পৰিৱৰ্তে লোকচানৰ ভৱিষ্যদ্বাণী কৰিছে। ডুবাই আন্তঃৰাষ্ট্ৰীয় বিমানবন্দৰ বিশ্বৰ অন্যতম ব্যস্ত বিমানবন্দৰ যদিও ইৰাণৰ ড্ৰ’ন আক্ৰমণে ইয়াৰ অৱস্থাত যথেষ্ট প্ৰভাৱ পেলাইছে।
আগতে ৰমজানত ডুবাইত বৃহৎ সংখ্যক আছিল যদিও এতিয়া পৰ্যটকে ইয়াক অসুৰক্ষিত বুলি বিবেচনা কৰিছে। আমেৰিকা, ব্ৰিটেইন, কানাডা, অষ্ট্ৰেলিয়াই অপ্ৰয়োজনীয় ভ্ৰমণৰ বিৰুদ্ধে সতৰ্কবাণী জাৰি কৰিছে। যদি আৰু ১-২ মাহ যুদ্ধ চলি থাকে তেন্তে ডুবাইৰ যথেষ্ট লোকচান হ’ব। ডুবাইৰ নিৰাপদ আশ্ৰয়স্থল হিচাপে ভাবমূৰ্তিৰ ক্ষতিৰ ফলত পৰ্যটনৰ পুনৰুদ্ধাৰত বছৰ বছৰ লাগিব পাৰে, আৰু ভ্ৰমণকাৰীসকলে ইউৰোপ বা এছিয়ালৈ স্থানান্তৰিত হ’ব পাৰে।
ডুবাইৰ ব্যৱসায়িক মডেল স্থিতিশীলতাৰ ওপৰত ভিত্তি কৰি গঢ় লৈ উঠিছে। বিশ্বমানৰ আন্তঃগাঁথনি, আৰু ইয়াৰ কেন্দ্ৰীয় অৱস্থানৰ বাবে বিশ্বৰ যিকোনো অংশলৈ সহজে যাব পৰাৰ বাবে শেহতীয়া বছৰবোৰত বহু বিদেশী কোম্পানীয়ে ডুবাইত কাৰ্যালয় আৰু মুখ্য কাৰ্যালয় স্থাপন কৰিছে। কিন্তু যুদ্ধ সম্পৰ্কীয় আক্ৰমণে মানুহক বাধা দিছে। বহু কোম্পানীয়ে নিজৰ কাৰ্যালয় খালী কৰিছে। চিটিগ্ৰুপ, পিডব্লিউচি, ডেলয়টৰ দৰে কোম্পানীয়ে নিজৰ কাৰ্যালয় খালী কৰিছে। বিদেশী বিনিয়োগকাৰী পলায়ন কৰিছে, ব্যৱসায় স্থবিৰ হৈ পৰিছে।
হৰমুজ জলদ্বীপ বন্ধ হোৱাৰ ফলত ডুবাইৰ লজিষ্টিক আৰু বাণিজ্যত প্ৰভাৱ পৰিছে, বীমাৰ খৰচ বৃদ্ধি পাইছে আৰু যোগান শৃংখলত ব্যাঘাত জন্মিছে। বৃদ্ধি পোৱা ইন্ধনৰ মূল্যই বিমান পৰিবহণ আৰু অন্যান্য খণ্ডৰ বাবে ব্যয় বৃদ্ধি কৰিছে। বিনিয়োগৰ কেন্দ্ৰ হিচাপে ডুবাইৰ মৰ্যাদা দুৰ্বল হ’ব পাৰে, আৰু বিনিয়োগকাৰীয়ে এছিয়া বা ইউৰোপৰ ফালে মুখ কৰিব পাৰে। যদিহে আৰু ১০-২০ দিন যুদ্ধ চলি থাকে তেন্তে পৰ্যটন, বিমান পৰিবহণ, আৰু প্ৰবাসী ব্যৱসায়ৰ ওপৰত যথেষ্ট প্ৰভাৱ পৰিব।
যদিহে যুদ্ধখন আঞ্চলিকভাৱে বিয়পি পৰে তেন্তে ডুবাইৰ নিৰাপত্তা বিপদত পৰিব পাৰে, আৰু ইয়াৰ প্ৰভাৱ দীৰ্ঘস্থায়ী হ’ব। বিশেষজ্ঞসকলৰ মতে যদি যুদ্ধ ক্ষিপ্ৰতাৰে শেষ হয় তেন্তে পুনৰুদ্ধাৰ সম্ভৱ, কিন্তু দীৰ্ঘদিন ধৰি চলি থাকিলে ডুবাইৰ বিশ্বব্যাপী কেন্দ্ৰ হিচাপে মৰ্যাদা সলনি হ’ব পাৰে।
