ক্ষমতাৰ পৰিৱৰ্তনৰ লগে লগে নেপালত এক ৰাজনৈতিক উত্তাল পৰিস্থিতিৰ সৃষ্টি হৈছে। নেপালৰ প্ৰাক্তন প্ৰধানমন্ত্ৰী কে পি শৰ্মা অলীক গুণ্ডুস্থিত বাসগৃহৰ পৰা নেপাল আৰক্ষীয়ে আটক কৰি ৰাখিছে। কাঠমাণ্ডু পোষ্টত প্ৰকাশিত এক বাতৰি অনুসৰি, এক গুৰুতৰ অপৰাধমূলক গোচৰত এই ব্যৱস্থা গ্ৰহণ কৰা হৈছে।
নেপাল আৰক্ষীয়ে উল্লেখ কৰিছে যে, এই গোচৰটোত হত্যাৰ দৰে গুৰুতৰ অপৰাধ জড়িত হৈ আছে। এই গোচৰটো ছেপ্টেম্বৰ মাহত সংঘটিত হোৱা GEN Z প্ৰতিবাদৰ সৈতে জড়িত। অভিযোগ কৰা হৈছে যে, সেই প্ৰতিবাদ দমনৰ সময়ত কিছুমান বিশেষ ঘটনা সংঘটিত হৈছিল, যিবোৰ এই ঘটনাৰ সৈতে জড়িত।
আৰক্ষীয়ে সমগ্ৰ বিষয়টোৰ তদন্ত অব্যাহত ৰাখিছে আৰু এই তদন্তৰ অংশ হিচাপে অলীক গ্ৰেপ্তাৰ কৰা হৈছে। এই ঘটনাই নেপালৰ ৰাজনীতিত উল্লেখযোগ্য অশান্তিৰ সৃষ্টি কৰিব পাৰে, কিয়নো কে পি শৰ্মা অলী দেশৰ অন্যতম বিশিষ্ট নেতা হিচাপে পৰিগণিত হৈছে। মন কৰিবলগীয়া যে, কে পি শৰ্মা অলীৰ উপৰিও নেপালৰ প্ৰাক্তন গৃহমন্ত্ৰী ৰমেশ লেখককো গ্ৰেপ্তাৰ কৰা হৈছে।
নেপালত প্ৰকাশ পোৱা তদন্ত আয়োগৰ প্ৰতিবেদনে নিৰাপত্তাৰক্ষীৰ ভূমিকাক লৈও গুৰুতৰ প্ৰশ্নৰ উত্থাপন কৰিছে। প্ৰতিবেদনখনে নেপাল আৰক্ষী, নেপাল সশস্ত্ৰ আৰক্ষী বাহিনী, সেনাবাহিনীৰ ভিতৰৰ কিছুমান বিষয়াৰ কাৰ্যক লৈ সন্দেহৰ সৃষ্টি কৰিছে। অৱশ্যে এই নিৰাপত্তা বাহিনীৰ বিৰুদ্ধে এই পৰ্যন্ত কোনো প্ৰত্যক্ষ ব্যৱস্থা গ্ৰহণ কৰা হোৱা নাই। তাৎক্ষণিক ব্যৱস্থা গ্ৰহণ কৰাৰ পৰিৱৰ্তে চৰকাৰে প্ৰথমে বিষয়টো পুংখানুপুংখভাৱে তদন্ত কৰাৰ সিদ্ধান্ত লৈছে।
উল্লেখ্য যে, নেপালৰ বৰ্তমানৰ প্ৰধানমন্ত্ৰী বালেন শ্বাহ কেবিনেটৰ সিদ্ধান্ত মৰ্মে প্ৰাক্তন প্ৰধানমন্ত্ৰী আৰু প্ৰাক্তন গৃহমন্ত্ৰীক গ্ৰেপ্তাৰ কৰা হৈছে।
