বিহাৰত এগৰাকী ব্যৱসায়ীৰ সৈতে এক চাঞ্চল্যকৰ কাণ্ড সংঘটিত হয়। প্ৰেমৰ সম্পৰ্কৰ ফলতেই এই ভয়ংকৰ কাণ্ড সংঘটিত হৈছে বুলি জানিব পৰা গৈছে।
বিহাৰৰ মুজাফ্ফৰপুৰত সংঘটিত হৈছে এই চাঞ্চল্যকৰ ঘটনা। ব্যৱসায়ী মাকেশ্বৰ পণ্ডিতৰ সৈতে এই কাণ্ড সংঘটিত হৈছে। ভুক্তভোগীৰ পত্নী, প্ৰেমিক আৰু ভায়েকে হত্যাকাণ্ড সংঘটিত কৰিবলৈ এজন পেছাদাৰী শ্বুটাৰ নিয়োগ কৰিছিল। আৰক্ষীয়ে মৃত লোকজনৰ পত্নী, প্ৰেমিক তথা ভাতৃক গ্ৰেপ্তাৰ কৰাৰ বিপৰীতে গুলীচালনা সংঘটিত কৰা লোকজনৰ সন্ধান অব্যাহত ৰাখিছে।
মতিপুৰ আৰক্ষী থানা এলেকাত যোৱা ২ এপ্ৰিলত বজাৰৰ পৰা ঘৰলৈ উভতি অহাৰ সময়তে ব্যৱসায়ী মাকেশ্বৰ পণ্ডিতক মূৰত আঘাত কৰে। থিতাতে মৃত্যু হয় ব্যৱসায়ীজনৰ। এই হত্যাকাণ্ডই অঞ্চলটোত চাঞ্চল্যৰ সৃষ্টি কৰে।
গোচৰটো সন্দৰ্ভত আৰক্ষীয়ে উল্লেখ কৰে যে, এই বিষয়টো প্ৰেমৰ সম্পৰ্কৰ সৈতে জড়িত আছিল। আৰক্ষীৰ মতে, চুবুৰীয়া মুন্না পণ্ডিতৰ সৈতে মৃতকৰ পত্নীৰ প্ৰেমৰ সম্পৰ্ক আছিল। যেতিয়া ভুক্তভোগীয়ে পত্নীৰ এই সম্পৰ্কৰ কথা দম পাইছিল, সেই সময়ছোৱাত মৃতকৰ ভাতৃ মহেশ পণ্ডিতো তেওঁৰ ঘৰলৈ আহিছিল আৰু তেওঁলোকৰ অবৈধ সম্পৰ্কৰ কথা জানিব পাৰিছিল।
আৰক্ষীৰ তদন্তত প্ৰকাশ পাইছে যে, মাকেশ্বৰে তেওঁৰ পত্নীক ফোনত কথা পাতি থকা অৱস্থাত ধৰা পেলাইছিল। তাৰ পিছত তেওঁ অভিযোগ কৰিবলৈ মুন্নাৰ ঘৰলৈ যায়, যাৰ ফলত দুয়োৰে মাজত বিবাদৰ সৃষ্টি হয়। এই বিবাদৰ পিছত মুন্না আৰু মহেশে মাকেশ্বৰক নিৰ্মূল কৰাৰ ষড়যন্ত্ৰ ৰচনা কৰে।
আৰক্ষীৰ মতে, অভিযুক্তসকলে এজন পেছাদাৰী শ্বুটাৰো নিয়োগ কৰিছিল। ২ এপ্ৰিলত মতীপুৰ বজাৰৰ পৰা ঘৰলৈ উভতি অহাৰ সময়ত শ্বুটাৰজনে মাকেশ্বৰ পণ্ডিতক গুলীয়াই হ*ত্যা কৰে। মৃতকৰ পিতৃ বালজী পণ্ডিতৰ বক্তব্যৰ ভিত্তিত মতিপুৰ আৰক্ষী থানাত গোচৰ ৰুজু কৰা হয়। অভিযানৰ সময়ত আৰক্ষীয়ে মুন্না আৰু মহেশ পণ্ডিতক গ্ৰেপ্তাৰ কৰে। জেৰাৰ সময়ত দুয়োজনে কেইবাটাও গুৰুত্বপূৰ্ণ তথ্য প্ৰকাশ কৰে।
