কাইলৈ ৰাজ্যত বিধানসভা নিৰ্বাচনৰ ভোটগ্ৰহণ। ২ কোটি ৫০ লাখ ৫৪ হাজাৰ ৪৬৩ গৰাকী ভোটাৰে নিৰ্ণয় কৰিব ৭২২ গৰাকী প্রার্থীৰ ভাগ্য। তৎপৰ হৈ উঠিছে আৰক্ষী-প্ৰশাসন। যাৱতীয় সা-সামগ্ৰী লৈ ভোটগ্ৰহণ কেন্দ্ৰলৈ ৰাওনা হৈছে সকলো নিৰ্বাচনী বিষয়া-কৰ্মচাৰী।
পুৱা ৭ বজাৰ পৰা ৰাজ্যখনৰ সৰ্বমুঠ ৩১,৪৯০ টা ভোট কেন্দ্ৰত আৰম্ভ হ’ব ভোটগ্ৰহণ। ইয়াৰ ভিতৰত ৩১,৪৮৬ টা মূল ভোটকেন্দ্ৰ আৰু ৪টা সহায়ক ভোটকেন্দ্ৰ। তিনিচুকীয়া, গোৱালপাৰা, বিশ্বনাথ আৰু শ্ৰীভূমিত স্থাপন হ’ব সহায়ক ভোটকেন্দ্ৰ। ভোট গ্রহণৰ বাবে সাজু ১,২৫,৯৬০ গৰাকী প’লিং- প্রিজাইডিং বিষয়া। আজিয়েই ভোটকেন্দ্রলৈ ৰাওনা হ’ব প’লিং- প্রিজাইডিং বিষয়াসকল।
ৱেবকাষ্টিং ব্যৱস্থাৰ জৰিয়তে ভোটকেন্দ্ৰসমূহৰ ভোটগ্রহণ প্রক্রিয়া জিলা নির্বাচনী বিষয়াৰ কার্যালয়। মুখ্য নির্বাচনী বিষয়াৰ কাৰ্যালয় আৰু নিৰ্বাচন আয়োগৰ কাৰ্যালয়ৰ পৰা পোনপটীয়াকৈ পর্যবেক্ষণ কৰিব পাৰিব।ভোটকেন্দ্ৰসমূহৰ সুৰক্ষাৰ বাবে মোতায়েন কৰা হৈছে কেন্দ্ৰীয় সশস্ত্ৰ আৰক্ষী বাহিনীৰ জোৱান।
ভোটকেন্দ্ৰলৈ গ’লে ভোটাৰসকলে মানিব লাগিব এইসমূহ নিয়ম-
- প্ৰথমবাৰৰ বাবে ভোটকেন্দ্ৰলৈ নিব নোৱাৰিব মোৱাইল
- ভোটকেন্দ্ৰৰ দুৱাৰমুখত থৈ যাব লাগিব মোৱাইল ফোন
- এটা ভোটকেন্দ্ৰত ১২০০ লোকেহে ভোট দিব পাৰিব
- ভোটগ্ৰহণ কেন্দ্ৰৰ প্ৰিজাইডিং বিষয়াই প্ৰতি ২ ঘণ্টাৰ মূৰে মূৰে ভোটদানৰ সঠিক সংখ্যা দাখিল কৰিব লাগিব
- EVMত এইবাৰ থাকিব প্ৰাৰ্থীসকলৰ ৰঙীন ফটো
- ভোটকেন্দ্ৰৰ ১০০ মিটাৰ দূৰৈত থাকিব লাগিব প্ৰাৰ্থীৰ বুথ
- ভোটদানৰ পিছতে ভোটাৰে লাভ কৰিব CLEAR INFORMATION SLIP
- ভোটগণনা সম্পূৰ্ণ হোৱাৰ ৭২ ঘণ্টাৰ ভিতৰত ECINETত সকলো নিৰ্বাচনী তথ্য ৰাজহুৱা কৰা হ’ব
- প্ৰতিগৰাকী BLO ৰ থাকিব সঠিক পৰিচয় পত্ৰ
- প্রতিটো ভোটকেন্দ্ৰতে খোৱা পানী, জিৰণি কোঠা, শৌচালয়, দিব্যাংগৰ বাবে হুইল চেয়াৰৰ ব্যৱস্থা
