কলিকতা কাণ্ড গোচৰত সৰ্বোচ্চ ন্যায়ালয়ৰ মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বাধীন তিনিজনীয়া বিচাৰপীঠে শুনানি গ্ৰহণ কৰি আছে। শুনানিৰ সময়ত বিচাৰপীঠে চিকিৎসকসকলক কামলৈ ঘূৰি অহাৰ নিৰ্দেশ প্ৰদান কৰিছে।
সমগ্ৰ দেশৰ আৱাসী (ৰেচিডেণ্ট) চিকিৎসকসকলে বিগত কেইবাদিন ধৰি ধৰ্মঘট অব্যাহত ৰাখিছে, যাৰ বাবে লাখ-লাখ লোক সমস্যাৰ সন্মুখীন হৈছে। ইয়াৰ উপৰি আদালতে মমতা চৰকাৰ, আৰ জি কৰ হাস্পতাল কৰ্তৃপক্ষ আৰু পশ্চিম বংগ আৰক্ষীৰ মনোভাৱক লৈও বহু প্ৰশ্ন উত্থাপন কৰে।
গোচৰৰ শুনানিৰ সময়ত আদালতে কি যুক্তি দিছিল জানো আহক-
১. এইমছ আৱাসী চিকিৎসকসকলে দাখিল কৰা গোচৰৰ শুনানি গ্ৰহণ কৰি সৰ্বোচ্চ ন্যায়ালয়ে কয় যে যদি চিকিৎসকসকলে কৰ্মলৈ উভতি নাযায় তেন্তে তেওঁলোকক অনুপস্থিত বুলি ধৰি লোৱা হ’ব। আইনে নিজৰ মতে কাম কৰিব। নেচনেল টাস্ক ফ’ৰ্চে সকলো লোকৰে অনুভৱ গুৰুত্বসহকাৰে গ্ৰহণ কৰিব বুলিও আশ্বাস প্ৰদান কৰে।
২. শুনানি গ্ৰহণ কৰি মুখ্য ন্যায়াধীশে কয় যে চিকিৎসকসকলে কৰ্মলৈ উভতি অহাটো প্ৰয়োজনীয়। চিকিৎসালয়ৰ মুৰব্বীসকলো চিকিৎসক আৰু তেওঁলোকৰ সমস্যা আৰু বিষয়ত আমি তেওঁলোকৰ লগত আছো, কিন্তু চিকিৎসকসকলে কামলৈ ঘূৰি নাহিলে চৰকাৰী স্বাস্থ্য সুবিধাৰ গাঁথনিত যথেষ্ট বিৰূপ প্ৰভাৱ পৰিব।
৩. উচ্চতম ন্যায়ালয়ে কয়, ‘আমি যদি বিভিন্ন অংশীদাৰৰ প্ৰতিনিধিক সমিতিৰ অংশ হ’বলৈ ক’বলৈ আৰম্ভ কৰো তেন্তে সমিতিৰ কাম-কাজ অসংগঠিত হৈ পৰিব। আমি জানো যে সমিতিখন জ্যেষ্ঠ মহিলা চিকিৎসকেৰে গঠিত আৰু তেওঁলোকে জনস্বাস্থ্যৰ আন্তঃগাঁথনিৰ বাবে নিজৰ জীৱন উৎসৰ্গা কৰিছে। সমিতিয়ে সকলো প্ৰশিক্ষাৰ্থী চিকিৎসকৰ কথা শুনিব। সমিতিখনে আৱাসী চিকিৎসক, জ্যেষ্ঠ আৱাসী চিকিৎসক, নাৰ্ছ, পেৰামেডিকেল কৰ্মচাৰীৰ লগতে সকলো প্ৰতিনিধিৰ কথা শুনাটো নিশ্চিত কৰিব’।
৪. শুনানিৰ সময়ত মুখ্য ন্যায়াধীশ চন্দ্ৰচুড়ে নিজৰ জীৱনৰ লগত ঘটা এক কাহিনীৰ কথাও উল্লেখ কৰে। তেওঁ এবাৰ এজন আত্মীয়ক দেখুৱাবলৈ চৰকাৰী হাস্পতাললৈ গৈছিলো। অসুস্থতাৰ বাবে তেওঁক ভৰ্তি কৰিবলগীয়া হোৱাত মই হাস্পতালৰ মজিয়াত শুব লগীয়া হৈছিল।
৫. উচ্চতম ন্যায়ালয়ত দাখিল কৰা ষ্টেটাছ ৰিপৰ্টত চিবিআইয়ে বহু চাঞ্চল্যকৰ তথ্য প্ৰকাশ কৰিছে। চিবিআইয়ে কয় যে সমগ্ৰ বিষয়টো সন্দৰ্ভত চিকিৎসালয় প্ৰশাসনৰ মনোভাৱ প্ৰশ্নবোধক যেন লাগে। ঘটনা সন্দৰ্ভত বহু পলমকৈ ভুক্তভোগী পৰিয়ালক তথ্য প্ৰদান কৰা হয়। প্ৰথমে পৰিয়ালৰ লোকক অসুস্থতাৰ কথা আৰু তাৰ পিছত আত্মহত্যাৰ বিষয়ে অৱগত কৰা হয়। অপৰাধৰ স্থান সলনি কৰা বুলিও দাবী কৰে চিবিআইয়ে। এইটো স্পষ্টকৈ দেখা যায় যে অপৰাধটো গাপ দিয়াৰ চেষ্টা কৰা হৈছিল।
৬. উচ্চতম ন্যায়ালয়ে বংগ চৰকাৰৰ অধিবক্তা কপিল ছিব্বালক কয় যে যেতিয়া আপুনি মৰণোত্তৰ পৰীক্ষা কৰিবলৈ আৰম্ভ কৰে, তেতিয়া ইয়াৰ অৰ্থ হ’ল অস্বাভাৱিক মৃত্যুৰ গোচৰ। ১১:২০ বজাত ইউ ডি ৮৬১/২৪ পঞ্জীয়ন কৰা হৈছিল, ৯ আগষ্টত পুলিচ ডায়েৰী (GD) এণ্ট্ৰি আৰু ১১:৪৫ বজাত এজাহাৰ পঞ্জীয়ন কৰা হৈছিল, এইটো সঁচা নেকি? এইটো বৰ আচৰিত কথা, মৰণোত্তৰ পৰীক্ষা ইউ ডিৰ পঞ্জীয়নৰ আগতেই হয়!
৭. আদালতে এইটোও কয় যে পুলিচ ডায়েৰী আৰু মৰণোত্তৰ পৰীক্ষাৰ মাজত ব্যৱধান যথেষ্ট। অভিযুক্তৰ চিকিৎসা পৰীক্ষা সন্দৰ্ভতো প্ৰশ্ন উত্থাপন কৰিছে আদালতে। ৩০ বছৰত এইধৰণৰ ঘটনা দেখা নাই বুলিও আদালতে মন্তব্য কৰে।
৮. মুখ্য ন্যায়াধীশগৰাকীয়ে কয়, ‘পুৱা ১০:১০ বজাত অপৰাধৰ জিডি এণ্ট্ৰি হয়, কিন্তু তৃতীয় মহলাত পিজি চিকিৎসকগৰাকী অচেতন অৱস্থাত উদ্ধাৰ হোৱা বুলি ফোনযোগে খবৰ লাভ কৰিছিল। মৃতদেহটো দেখাৰ পিছত ব’ৰ্ডে প্ৰাৰম্ভিক মতামত দিছিল যে মৃত্যুৰ কাৰণ হ’ব পাৰে ডিঙি চেপি হত্যা কৰা আৰু যৌন নিৰ্যাতনও নুই কৰিব নোৱাৰি। ইয়াৰ পিছতো মৰণোত্তৰ পৰীক্ষা সন্ধিয়া ৬-৭ বজাৰ ভিতৰত হৈছিল আৰু ইয়াৰ পিছতহে তদন্ত আৰম্ভ হৈছিল’। এই সন্দৰ্ভত কপিল ছিব্বালে কয় যে নহয়, এইটো শুদ্ধ নহয়।
৯. ন্যায়াধীশ পাৰদিৱালাই কয়, ‘সহকাৰী আৰক্ষী অধীক্ষকৰ আচৰণো অতি সন্দেহজনক। তেওঁ কিয় এনে কৰিলে?’
১০. মুখ্য ন্যায়াধীশে কয়, ‘পুলিচ ডায়েৰীত পুৱা ৫:২০ বজাত এণ্ট্ৰী কিন্তু আৰক্ষীয়ে চিকিৎসালয়ৰ পৰা তথ্য লাভ কৰিছিল যে মহিলাগৰাকীয়ে পুৱা ১০:১০ বজাত অৰ্ধনগ্ন অৱস্থাত পৰি আছিল। মেডিকেল ব’ৰ্ডে মতামত দিছিল যে ধৰ্ষণ সংঘটিত হৈছিল আৰু আৰক্ষীৰ ডায়েৰীৰ এণ্ট্ৰীত দেখা গৈছে যে মৰণোত্তৰ পৰীক্ষাৰ পিছতহে অপৰাধস্থলীটো ঘেৰাও কৰা হৈছিল’।
