মৃত্যু মুখৰ পৰা বাচিল চাৰিজন যুৱক। উত্তৰ প্ৰদেশৰ আগ্ৰাত গণেশ মূৰ্তি বিসৰ্জনৰ সময়ত এটা ভয়ংকৰ ঘটনাত কথমপি প্ৰাণ ৰক্ষা পৰিল চাৰিজন যুৱকৰ। মূৰ্তি বিসৰ্জনৰ সময়ত যমুনা নদীৰ গভীৰ পানীত ডুব যোৱা চাৰিজন যুৱকক এগৰাকী ১৮ বছৰীয়া ছাত্ৰীয়ে উদ্ধাৰ কৰা ঘটনাই দেশজুৰি চৰ্চা লাভ কৰিছে।
নিজৰ জীৱনৰ কথা নাভাবি দশম শ্ৰেণীত অধ্যয়নৰত ছাত্ৰী মোহিনী গোস্বামীয়ে যুৱক চাৰিজনৰ প্ৰাণ ৰক্ষা কৰিবলৈ নদীত জাঁপ দিয়ে। মোহিনীয়ে সাহস দেখুৱাই এজন এজনকৈ চাৰিজন যুৱকৰ জীৱন ৰক্ষা কৰিলে।
কেনেকৈ সংঘটিত হ’ল দুৰ্ঘটনাটো?
জানিব পৰা অনুসৰি, আগ্ৰাৰ বটেশ্বৰধামৰ যমুনা নদীৰ পাৰত হৈছিল গণেশ মূৰ্তিৰ বিসৰ্জন। এই সময়ছোৱাত কিছু মানুহ নদীত গা ধুবলৈ নামিছিল। দুজন যুৱক, আকাশ আৰু তেওঁৰ সতীৰ্থই গা ধুই থকা অৱস্থাত নদীৰ দ’ পানীত সোমাই পৰে।
আন দুজন যুৱকেও তেওঁলোকক বচাবলৈ নদীত নামি যায় যদিও তেওঁলোকো ডুব যাবলৈ ধৰে। ঘাটত থকা লোকসকলৰ মাজত এক অস্বাভাৱিক পৰিৱেশৰ সৃষ্টি হয়।
ঘাটত থকা লোকসকলে কি কৰিম কি নকৰিম বুলি ভাবি থকাৰ সময়তে নিজৰ সাহস দেখুৱাই মোহিনীয়ে যুৱক চাৰিজনক উদ্ধাৰ কৰিবলৈ নদীত জাঁপ দিয়ে।
মোহিনীয়ে নিজৰ সাঁতোৰ দক্ষতাক সাৰোগত কৰি এডাল ৰছীৰ সহায়ত এজন এজনকৈ চাৰিজন যুৱকক নিৰাপদ স্থানলৈ উলিয়াই আনিবলৈ সক্ষম হয়।
উল্লেখ্য যে, ঘাটত পূজা সামগ্ৰী বিক্ৰী কৰা মোহিনীৰ জীৱন সংগ্ৰাম বহু ঘাট প্ৰতিঘাটেৰে ভৰা। পিতৃৰ অঁকাল মৃত্যুৰ পিছতে বটেশ্বৰ ধামত মাকৰ সৈতে থাকে আৰু ঘাটত পূজাৰ সামগ্ৰী বিক্ৰী কৰি নিজৰ লগতে পৰিয়ালক পোহপাল দি আছে।
মোহিনী সৰুৰে পৰা সাঁতোৰত আকৰ্ষিত আছিল, আৰু তাই নিজেই সাঁতোৰ শিকিছিল। এই দক্ষতাই আজি চাৰিজনৰ জীৱন ৰক্ষা কৰাত সহায় কৰিলে। মোহিনীৰ এই সাহসিকতাক সকলোৱে প্ৰশংসাৰে উপচাই পেলোৱাৰ লগতে সমগ্ৰ অঞ্চলটোত তেওঁৰ সাহস আৰু সাঁতোৰ দক্ষতাৰ কথাও চৰ্চা হৈছে।
