আজি ৰাষ্ট্ৰপিতা-মহামানৱ মহাত্মা গান্ধীৰ ১৫৫ সংখ্যক জয়ন্তী। প্ৰতিবছৰে ২ অক্টোবৰত দেশবাসীয়ে পালন কৰি আহিছে গান্ধী জয়ন্তী। এই বিশেষ দিনটোত আমি আপোনালোকক জনাম যে মুম্বাইত অনুষ্ঠিত হ’বলগীয়া এখন ক্ৰিকেট প্ৰতিযোগিতা কিয় বিৰোধিতা কৰিছিল মহাত্মা গান্ধীয়ে।
গান্ধীজীয়ে ১৯৪০ চনত মুম্বাইত অনুষ্ঠিত হোৱা ‘পেন্টাংগুলাৰ’ প্ৰতিযোগিতাৰ বিৰোধিতা কৰিছিল কাৰণ প্ৰতিযোগিতাখনত অংশ ল’বলগীয়া দলবোৰ ধৰ্মৰ ভিত্তিত বাচনি কৰা হৈছিল।
সম্পূৰ্ণ কাহিনীটো কি জানো আহক…
উল্লেখ্য যে পেন্টাংগুলাৰ টুৰ্ণামেণ্টত অংশগ্ৰহণ কৰা বেছিভাগ দলেই ধৰ্মৰ ভিত্তিত বিভক্ত হৈছিল। এই প্ৰতিযোগিতাত হিন্দু ক্লাব, মুছলিম ক্লাব, পাৰ্চী একাদশৰ দৰে দল অন্তৰ্ভুক্ত কৰা হৈছিল। ইউৰোপীয় একাদশ নামৰ এটা দলো এই প্ৰতিযোগিতাত অংশগ্ৰহণ কৰিছিল।
ধৰ্মৰ ভিত্তিত দলবোৰ বাচনি কৰাৰ উপৰি সেই সময়ত চলি থকা দ্বিতীয় বিশ্বযুদ্ধৰ বাবেও গান্ধীজীয়ে এই প্ৰতিযোগিতাৰ বিৰোধিতা কৰিছিল। জাতিৰ পিতাই কৈছিল যে যুদ্ধৰ বাবে সমগ্ৰ বিশ্বতে শোকৰ পৰিৱেশে বিৰাজ কৰিছে।
এই প্ৰতিযোগিতাখন মানুহে আঁকোৱালি লোৱা পৰিলক্ষিত হৈছিল। প্ৰতিযোগিতাখনৰ পূৰ্বে অনুষ্ঠিত হোৱা ট্ৰায়েল মেচবোৰ চাবলৈ বৃহৎ সংখ্যক লোক ষ্টেডিয়ামলৈ আহিছিল। ইয়াৰ মাজতে মহাত্মা গান্ধীয়ে ১৯৪০ চনৰ ডিচেম্বৰ মাহত ৱৰ্ধাত উপস্থিত হৈ জিমখানা ক্ৰিকেট ক্লাবৰ সভাপতি এছ এ শ্বেতে, উপ-সভাপতি এম এম অমৰসী আৰু পৰিচালনা সমিতিৰ সদস্য জামনাদাস পীতাম্বৰক লগ পাইছিল। গান্ধীজীৰ এই বৈঠক ১৯৪০ চনৰ ০৬ ডিচেম্বৰত হৈছিল, আনহাতে প্ৰতিযোগিতাখন ১৪ ডিচেম্বৰৰ পৰা আৰম্ভ হ’বলগীয়া আছিল।
প্ৰতিনিধি দলটোৱে বিচৰা মতামত সন্দৰ্ভত গান্ধীজীয়ে কয়, ‘এই সংঘাত ৰোধ কৰিব বিচৰাসকলৰ প্ৰতি মোৰ সহানুভূতি। যুদ্ধৰ বাবে শোকৰ পৰিৱেশ। এছিয়াৰ লগতে ইউৰোপ আৰু ইয়াৰ সংস্কৃতিৰ স্থিতিশীলতাৰ প্ৰতি ভাবুকি আহিছে। আগন্তুক মেচসমূহ বন্ধ কৰাৰ বাবে চলি থকা আন্দোলনক মই সমৰ্থন কৰিম।’
ইয়াৰ উপৰি মহাত্মা গান্ধীয়ে ধৰ্মৰ ভিত্তিত দল বিভাজন সন্দৰ্ভত কয়, ‘মই বিচাৰো যে বম্বেৰ জনসাধাৰণে নিজৰ ক্ৰীড়া সংহিতা সংশোধন কৰি ইয়াৰ পৰা সাম্প্ৰদায়িকতা আঁতৰাই পেলাওক। কলেজ আৰু প্ৰতিষ্ঠানৰ মাজত হোৱা প্ৰতিযোগিতা মই বুজিব পাৰো, কিন্তু হিন্দু, মুছলমান আৰু পাৰ্চীসকলৰ মাজত হোৱা প্ৰতিযোগিতাৰ কাৰণ বুজি পোৱা নাই? ইতিবাচক দৃষ্টিভংগীৰে চিন্তা কৰক আৰু ক্ৰীড়া জগতৰ পৰা সাম্প্ৰদায়িকতাক আঁতৰোৱাৰ সিদ্ধান্ত গ্ৰহণ কৰক’।
