আমেৰিকাৰ ৰাষ্ট্ৰপতি নিৰ্বাচনত ড’নাল্ড ট্ৰাম্পৰ জয়ৰ পিছতেই বৃদ্ধি পাইছে কানাডাত উত্তেজনা। ঘোষণা কৰা হৈছে হাই এলাৰ্ট। দৰাচলতে ট্ৰাম্পৰ জয়ৰ লগে লগে আমেৰিকাৰ পৰা বৃহৎ সংখ্যক অবৈধ অনুপ্ৰৱেশকাৰী অহাৰ আশংকা কৰিছে কানাডাৱাসীয়ে।
কানাডাৰ বিষয়াসকলে কয় যে, এই সন্দৰ্ভত তেওঁলোক যথেষ্ট সতৰ্ক হৈ আছে। অনুপ্ৰৱেশ ৰোধ কৰিবলৈ সীমান্তত সকলো ধৰণৰ সাৱধানতা অৱলম্বন কৰা হৈছে। প্ৰায় ৯ হাজাৰ কিলোমিটাৰ দৈৰ্ঘ্যত বিস্তৃত আমেৰিকা-কানাডা সীমান্তত কেমেৰা, চেন্সৰ আৰু ড্ৰ’নৰ সহায়ত নিৰীক্ষণ কৰা হৈছে।
এনে পৰিস্থিতিৰ সৈতে মোকাবিলা কৰিবলৈ কানাডাৰ ডেপুটি প্ৰধানমন্ত্ৰী ক্ৰীষ্টিয়া ফ্ৰীলেণ্ডে তেওঁৰ বিষয়াসকলৰ সৈতে মাৰাথন বৈঠক অনুষ্ঠিত কৰিছে।
প্ৰশ্ন উত্থাপন হয় যে আমেৰিকা-কানাডা সীমান্তত নিৰাপত্তা ইমান কটকটীয়া কৰাৰ কাৰণ কি?
দৰাচলতে আমেৰিকাৰ ৰাষ্ট্ৰপতি নিৰ্বাচনত ড’নাল্ড ট্ৰাম্পে অবৈধ অনুপ্ৰৱেশকাৰীক অধিক আক্ৰমণ কৰিছিল। তেওঁ অবৈধ অনুপ্ৰৱেশকাৰীক ‘দেশৰ তেজ বিষাক্ত কৰা’ বুলি অভিহিত কৰিছে। তেওঁ প্ৰতিশ্ৰুতি দিছিল যে বিজয়ৰ পিছত তেওঁ আমেৰিকাৰ ইতিহাসৰ আটাইতকৈ ডাঙৰ গণ বিতাড়নৰ কথা ঘোষণা কৰিব। আনকি তেওঁৰ প্ৰথম কাৰ্যকালত (২০১৭ চনৰ পৰা ২০২১ চনলৈ) ১০ হাজাৰতকৈ অধিক অবৈধ অনুপ্ৰৱেশকাৰীয়ে কানাডালৈ পলায়ন কৰিবলগীয়া হৈছিল।
ৰয়েল কানাডিয়ান মাউণ্টেড পুলিচৰ মুখপাত্ৰ চাৰ্জেণ্ট চাৰ্লছ প’ইৰিয়ে এ এফ পিক কয় যে, তেওঁলোক যথেষ্ট সতৰ্ক হৈ আছে। কিয়নো তেওঁলোকে আশংকা কৰিছে যে, অনুপ্ৰৱেশকাৰীৰ ওপৰত ট্ৰাম্পৰ স্থিতিৰ ফলত কানাডালৈ অবৈধ প্ৰব্ৰজনৰ ধাৰা বৃদ্ধি পাব পাৰে।
একে সময়তে উপ-প্ৰধানমন্ত্ৰী ফ্ৰীলেণ্ডে বিষয়াসকলৰ সৈতে হোৱা বৈঠকৰ পিছত কয় যে, এই পৰিস্থিতিৰ সৈতে মোকাবিলা কৰিবলৈ তেওঁলোক সাজু। একে সময়তে কানাডাত স্থায়ী বাসস্থানৰ বাবে আবেদন পত্ৰ সম্পূৰ্ণ কৰিবলৈ ১ বছৰ আৰু আশ্ৰয়ৰ অনুমোদন লাভ কৰিবলৈ ৪৪ মাহ সময় লোৱাৰ সম্ভাৱনা আছে।
