শিৰোমণি আকালী দলৰ অধ্যক্ষ সুখবীৰ সিং বাদলে অধ্যক্ষ পদৰ পৰা পদত্যাগ কৰিছে। দেশৰ অন্যতম জ্যেষ্ঠ ৰাজনীতিবিদগৰাকীয়ে আজি কাৰ্যকৰী সমিতিক পদত্যাগ পত্ৰ দাখিল কৰে। তেওঁৰ নিজৰ কাৰ্যকালৰ সময়ত দলৰ আন আন নেতা-কৰ্মীসকলে সহায় সহযোগিতা কৰাৰ বাবে সকলোকে ধন্যবাদ জ্ঞাপন কৰে।
শিৰোমণি আকালী দলৰ নেতা দলজিৎ সিং চিমাই কয়, ‘শিৰোমণি আকালী দলৰ অধ্যক্ষ সুখবীৰ সিং বাদলে নতুন অধ্যক্ষ নিৰ্বাচনৰ বাট প্ৰসস্ত কৰাৰ বাবে তেওঁ অধ্যক্ষ পদৰ পৰা পদত্যাগ কৰিছে। তেওঁ নিজৰ কাৰ্যকালৰ সময়ত তেওঁক সহায়-সহযোগিতা আগবঢ়োৱা প্ৰতিগৰাকী দলীয় নেতা-কৰ্মীক অন্তৰেৰ ধন্যবাদ জ্ঞাপন কৰে।’
অৱশ্যে দলৰ নেতা দলজিৎ সিং চিমাই ইয়াক ৰুটিন দলীয় প্ৰক্ৰিয়া বুলি অভিহিত কৰিছে। ২০১৯ চনৰ ডিচেম্বৰ মাহত দলৰ সভাপতি নিৰ্বাচিত হোৱাৰ পিছত আগন্তুক ১৪ ডিচেম্বৰত পাঁচ বছৰীয়া কাৰ্যকাল সম্পূৰ্ণ হ’ব বুলিও কয়। গতিকে সভাপতি পদৰ বাবে পুনৰ নিৰ্বাচন হ’ব আৰু ইয়াৰ পূৰ্বে সুখবীৰ সিং বাদলে নিৰ্বাচনৰ পূৰ্বে পদৰ পৰা পদত্যাগ কৰিছে। সোমবাৰে দলৰ কাৰ্যকৰী সমিতিৰ বৈঠকত সুখবীৰ সিং বাদলৰ পদত্যাগ সন্দৰ্ভত আলোচনা কৰা হ’ব বুলিও তেওঁ কয়।
২০০৮ চনত সুখবীৰ সিং বাদলে শিৰোমণি আকালী দলৰ অধ্যক্ষ পদত অধিষ্ঠিত হৈছিল। তেওঁ সুদীৰ্ঘ ১৬ বছৰ আৰু দুমাহ সময় দলৰ অধ্যক্ষৰূপে কাৰ্যনিৰ্বাহ কৰিছে। সুখবীৰ সিং বাদলৰ পূৰ্বে অধ্যক্ষ পদত অধিষ্ঠিত আছিল তেওঁৰ পিতৃ প্ৰকাশ সিং বাদল।
উল্লেখ্য যে, অহা ২০ নৱেম্বৰত পঞ্জাৱৰ চাৰিটা বিধানসভা সমষ্টিত হ’বলগীয়া উপ-নিৰ্বাচনৰ পূৰ্বে সুখবীৰ সিং বাদলে অধ্যক্ষ পদৰ পৰা পদত্যাগ কৰা বিষয়টোৱে ৰাজ্যখনৰ ৰাজনীতিত ব্যাপক চৰ্চা লাভ কৰিছে।
