কোকৰাঝাৰ জিলাৰ বডোফা উপেন্দ্ৰ নাথ ব্ৰহ্মৰ জন্মস্থান দোতমাত অনুষ্ঠিত হ’ব নিখিল বড়ো ছাত্ৰ সন্থা চমুকৈ এবছুৰ ৫৭ সংখ্যক কেন্দ্ৰীয় অধিৱেশন। বড়ো জাতীয়তাবাদৰ লগতে বড়ো জনগোষ্ঠীৰ উত্তৰণত যথেষ্ট উল্লেখনীয় অৰিহনা আগবঢ়োৱা এবছুৰ অধিৱেশনৰ বাবে মুকলি কৰা হয় অভ্যৰ্থনা সমিতিৰ অস্থায়ী কাৰ্যালয়।
শুকুৰবাৰে দোতমা আঞ্চলিক ক্ৰীড়া সন্থাৰ ইণ্ডোৰ ষ্টেডিয়ামত অভ্যৰ্থনা সমিতিৰ অস্থায়ী কাৰ্যালয় মুকলি কৰে ৰাজ্যৰ কেবিনেট মন্ত্ৰী উৰ্খাউ গৌৰা ব্ৰহ্মই। এই অনুষ্ঠানৰ পূৰ্বে এবছুৰ সাংগঠনিক পতাকা উত্তোলন কৰে এবছুৰ কেন্দ্ৰীয় সভাপতি দ্বীপেন বড়োৱে।
পতাকা উত্তোলনৰ অন্তত এবছুৰ সভাপতি দ্বীপেন বড়োৱে দোতমাত অনুষ্ঠিত হ’বলগীয়া এবছুৰ ৫৭ সংখ্যক কেন্দ্ৰীয় অধিৱেশন জাতীয়তাবাদ আৰু শৈক্ষিক, আৰ্থ-সামাজিক দিশৰ ওপৰত এক ঐতিহাসিক অধিৱেশন হ’ব বুলি সংবাদ মাধ্যমৰ আগত উল্লেখ কৰে।
২০২৫ৰ ৬, ৭, ৮ আৰু ৯ ফেব্ৰুৱাৰীত চাৰিদিনীয়া বৰ্ণাঢ্য কাৰ্য্যসূচীৰে অনুষ্ঠিত হ’বলগীয়া এই অধিৱেশনত মুখ্য অতিথি হিচাপে উপস্থিত থাকিব ভাৰতৰ কেন্দ্ৰীয় গৃহমন্ত্ৰী অমিত শ্বাহ। লগতে পঞ্চাশ হাজাৰ ছাত্ৰ-ছাত্ৰীৰ সতে এক মত বিনিময় অনুষ্ঠানত অংশ ল’ব নবেল বঁটা বিজয়ী কৈলাশ সত্যাৰ্থীয়ে।
ইয়াৰ উপৰি পাঁচ হাজাৰ প্ৰতিনিধিয়ে অংশ ল’বলগীয়া এই অধিৱেশনতে এবছুৰ পুৰণি সমিতিখন ভংগ কৰি নতুন কেন্দ্ৰীয় সমিতি গঠন কৰা হ’ব।
ইফালে অভ্যৰ্থনা সমিতিৰ অধ্যক্ষ তথা কোকৰাঝাৰৰ বিধায়ক লৰেন্স ইছলাৰীয়ে সকলো শ্ৰেণীৰ ৰাইজক এবছুৰ অধিবেশনখন সাফল্যমণ্ডিত কৰি তুলিবৰ বাবে সহায়-সহযোগিতা আগবঢ়াবলৈ আহ্বান জনাইছে।
