সংখ্যালঘু নেতা তথা সন্যাসী চিন্ময় কৃষ্ণ দাসৰ গ্ৰেপ্তাৰক লৈ উত্তাল হৈ আছে বাংলাদেশ। কাৰাবন্দী নেতাজনৰ মুক্তিৰ দাবীত অব্যাহত থকা প্ৰতিবাদৰ মাজতে নতুনকৈ আৰু দুজন সন্যাসীক গ্ৰেপ্তাৰ কৰাৰ খবৰ পোহৰলৈ আহিছে।
চিন্ময় কৃষ্ণ দাসক গ্ৰেপ্তাৰ কৰা গোচৰৰ ভিত্তিতে এই দুজন সন্যাসীক গ্ৰেপ্তাৰ কৰা বুলি চট্টগ্ৰাম আৰক্ষীয়ে জনাইছে। ঘটনা সন্দৰ্ভত ইয়াতকৈ আৰু অধিক তথ্য প্ৰকাশ কৰা নাই আৰক্ষীয়ে।
শেহতীয়াকৈ গ্ৰেপ্তাৰ হোৱা সন্ন্যাসী দুগৰাকী হৈছে ৰুদ্ৰপ্ৰতি কেশৱ দাস আৰু ৰঙানাথ শ্যামসুন্দৰ দাস। দুয়োগৰাকী সংখ্যালঘু সংগঠনৰ নেতা। সূত্ৰৰ পৰা জানিব পৰা মতে, এই দুয়োজন সংখ্যালঘু নেতাই চট্টগ্ৰাম জে’লত বন্দী চিন্ময়কৃষ্ণক সাক্ষাত কৰিবলৈ গৈছিল। জে’লত বন্দী নেতাজনক খাদ্য, ঔষধ আৰু টকা দিবলৈ যোৱা বুলি জানিব পৰা গৈছে। আৰু নিশা জেইলৰ পৰা উভতি অহাৰ পথত আৰক্ষীয়ে তেওঁলোকক জিম্মাত লয়।
প্ৰৱৰ্তক সংঘৰ অধ্যক্ষ গৌৰাংগ দাসে কয়, ‘কাৰাগাৰত চিন্ময় কৃষ্ণক খাদ্য দিবলৈ যোৱা আমাৰ দুজন সদস্যক গ্ৰেপ্তাৰ কৰা হয়। তেওঁলোকৰ ভইচ মেছেজৰ পৰা এই তথ্য লাভ কৰিছো। তেওঁলোকক কোটোৱালি থানাত আবদ্ধ কৰি ৰখা বুলি জানিবলৈ দিয়ে। পিছত তেওঁলোকক জে’ললৈ লৈ যোৱা হয়।’
উল্লেখ্য যে, ৫ আগষ্টত বাংলাদেশ চৰকাৰ পতনৰ পিছৰে পৰা দেশখনত সংখ্যালঘুৰ ওপৰত অত্যাচাৰৰ মাত্ৰা যথেষ্ট পৰিমানে বৃদ্ধি পাইছে। চিন্ময় কৃষ্ণই সংখ্যালঘুৰ অধিকাৰৰ বাবে মাত মাতিছিল। এখন সমাৱেশত দিয়া ভাষণত ৰাষ্ট্ৰদ্ৰোহৰ অভিযোগ উত্থাপন কৰি যোৱা সোমবাৰে তেওঁক বাংলাদেশ আৰক্ষীয়ে গ্ৰেপ্তাৰ কৰে।
