পুৰণি আলুক নতুন আলুলৈ ৰূপান্তৰিত কৰিব পৰা প্ৰক্ৰিয়াৰ বিষয়ে আপুনি জানেনে? এই প্ৰশ্নটো অলপ আচৰিত যেন লাগিব পাৰে, কিন্তু একাংশ ব্যৱসায়ীয়ে এমোনিয়া ছলিউচনৰ সহায়ত পুৰণি আলু নতুনৰ দৰে বনাই দুগুণ দামত বিক্ৰী কৰে।
উত্তৰ প্ৰদেশৰ গোৰখপুৰত খাদ্য সুৰক্ষা বিভাগৰ বিষয়াসকলে তদন্তৰ সময়ত এই ঘটনা ধৰা পেলাই প্ৰায় ১৮০ কুইণ্টল আলু ধ্বংস কৰে।
সহকাৰী আয়ুক্ত খাদ্য ডাঃ সুধীৰ কুমাৰ সিঙে কয় যে সাহজানৱা ৰে’লৱে ষ্টেচনৰ সমীপৰ বজাৰত এমোনিয়া ৰাসায়নিক দ্ৰব্যৰে প্ৰস্তুত কৰা আলু নতুন ৰূপে বিক্ৰী কৰা হৈছে বুলি তথ্য লাভ কৰা হৈছে। একেসময়তে গোৰখপুৰ মণ্ডিতো ভেজাল আলু বিক্ৰী কৰাৰ অভিযোগ পোৱা গৈছিল। এনে পৰিস্থিতিত যেতিয়া দলটোৱে দুয়োটা স্থানতে অভিযান চলাইছিল তেতিয়া সত্যটো ওলাই আহিছিল।
সাহজানৱাত ৬০ কেজি আলু জব্দ কৰাৰ লগতে গোৰখপুৰত এক কুইণ্টল ২০ কেজি মিশ্ৰিত আলু জব্দ কৰে। বিষয়াসকলে জনোৱা মতে, ব্যৱসায়ীজনে জেৰাৰ সময়ত স্বীকাৰ কৰে যে, তেওঁ এই আলু সন্ত কবীৰ নগৰৰ পৰা কিনে। লগতে তেওঁ কয় যে, এক কুইণ্টল আলুত ১০ কেজি নতুন আলু আৰু ৯০ কেজি পুৰণি আলুৰ অনুপাত আছে। পুৰণি আলু ৰাসায়নিক দ্ৰব্যৰে প্ৰস্তুত কৰা হয়।
বিশেষজ্ঞসকলে কয় যে, বজাৰত এমোনিয়া প্ৰতি কেজিত ৫০ টকাৰ হাৰত পোৱা যায়। ইয়াৰ দ্ৰৱ প্ৰস্তুত কৰি তাত পুৰণি আলু ১৪ ঘন্টা ডুবাই ৰখা হয়। ইয়াৰ পিছত ইয়াক উলিয়াই মাটিত ঘঁহি দিয়া হয়। ৰাসায়নিক পদাৰ্থৰ বাবে ইয়াৰ খোলাটো অতি কোমল হৈ পৰে, অলপ ঘঁহিলেহে ইয়াৰ খোলাটো ওলাই যায়।
এই সন্দৰ্ভত ডাঃ সোহন গুপ্তাই কৈছে যে, আমাৰ শৰীৰতো এমোনিয়া উৎপন্ন হয়। আমাৰ শৰীৰত প্ৰতি ডেচিলিটাৰত ১৫ৰ পৰা ৪৫ মাইক্ৰ’গ্ৰামৰ পৰিমাণত এমোনিয়া থাকে। গতিকে আমি যেতিয়া ৰাসায়নিক পদাৰ্থযুক্ত খাদ্য গ্ৰহণ কৰোঁ, তেতিয়া ইয়াৰ মাত্ৰা বৃদ্ধি পায়, যি অতি বিপদজনক।
এনে আলু সেৱনে মানসিক ভাৰসাম্য বিনষ্ট কৰিব পাৰে। যকৃতৰো ক্ষতিসাধন কৰিব পাৰে। অৱসাদৰ মাত্ৰাও বৃদ্ধি কৰিব পাৰে। ইয়াৰ ফলত পেট ফুলা, ভোক নলগা আৰু কোষ্ঠকাঠিন্যও হ’ব পাৰে। যদি শৰীৰত এমোনিয়াৰ মাত্ৰা বৃদ্ধি পায়, তেন্তে ই মাৰাত্মক বুলিও প্ৰমাণিত হ’ব পাৰে।
