শ্বেখ হাছিনাৰ চৰকাৰৰ পতনৰ পিছত বাংলাদেশত হিন্দুৰ ওপৰত আক্ৰমণৰ বহু ঘটনা পোহৰলৈ আহিছে।বিগত কেইসপ্তাহমানৰ পৰা বাংলাদেশত হিন্দু আৰু অন্যান্য সংখ্যালঘুৰ বিৰুদ্ধে হিংসাৰ ঘটনা বৃদ্ধি পাইছে।
বাংলাদেশৰ হিন্দু মন্দিৰতসমূহতো আক্ৰমণৰ ঘটনা সংঘটিত হৈছে। বিশেষকৈ শেহতীয়াকৈ এজন হিন্দু সাধু চিন্ময় কৃষ্ণ দাসক গ্ৰেপ্তাৰ কৰা হৈছে। ভাৰতকে ধৰি বহু দেশে বাৰে বাৰে বাংলাদেশত হিন্দুসকলক টাৰ্গেট কৰা বাবে উদ্বেগ প্ৰকাশ কৰি আহিছে।
ভাৰতৰ বৈদেশিক সচিব বিক্ৰম মিষ্ট্ৰীয়ে বাংলাদেশৰ নেতৃত্বৰ সৈতে হোৱা বৈঠকত সংখ্যালঘু লোকৰ ওপৰত আক্ৰমণৰ ঘটনাৰ কথা উত্থাপন কৰাৰ সময়ত বাংলাদেশ ভ্ৰমণ কৰিছিল। তেওঁ সংখ্যালঘুৰ সুৰক্ষা সন্দৰ্ভত ভাৰতৰ উদ্বেগ প্ৰকাশ কৰিছিল। তেওঁৰ ভ্ৰমণৰ পিছত বাংলাদেশে সংখ্যালঘু, মূলতঃ হিন্দুৰ বিৰুদ্ধে হিংসাৰ ৮৮টা ঘটনা স্বীকাৰ কৰে।
অন্তৱৰ্তীকালীন চৰকাৰৰ মুৰব্বী মহম্মদ ইউনুছৰ প্ৰেছ সচিব ছফিকুল আলমে কয় যে, এই ঘটনাসমূহত ৭০ জন লোকক গ্ৰেপ্তাৰ কৰা হৈছে। ছফিকুল আলমে কয় যে, ৫ আগষ্টৰ পৰা ২২ অক্টোবৰলৈ সংখ্যালঘুৰ সৈতে জড়িত কাণ্ডত মুঠ ৮৮টা গোচৰ ৰুজু হৈছে।
প্ৰেছ সচিব আলমৰ মতে, সুনামগঞ্জ, মধ্য গাজীপুৰ আদি অঞ্চলতো নতুনকৈ হিংসাত্মক ঘটনা সংঘটিত হোৱাৰ বাবে গ্ৰেপ্তাৰৰ সংখ্যা বৃদ্ধি পোৱাৰ সম্ভাৱনা আছে।তেওঁ কয় যে, এনে কিছুমান ভুক্তভোগী হয়তো পূৰ্বৰ শাসকীয় দলৰ সদস্যও হ’ব পাৰে।
বাংলাদেশৰ ১৭ কোটি জনসংখ্যাৰ প্ৰায় ৮ শতাংশ হিন্দু। ৫ আগষ্টত শ্বেখ হাছিনা নেতৃত্বাধীন আৱামী লীগ চৰকাৰখনক উৎখাত কৰাৰ পিছতেই বাংলাদেশৰ ৫০খনতকৈও অধিক জিলাত হিন্দুসকলৰ ওপৰত ২০০ৰো অধিক আক্ৰমণ সংঘটিত হোৱাৰ অভিযোগ উত্থাপন হৈছে।
আগষ্ট মাহত চৰকাৰ বিৰোধী ব্যাপক প্ৰতিবাদৰ বাবে শ্বেখ হাছিনাই দেশ এৰি যাবলৈ বাধ্য হৈছিল, তাৰ পিছত দুয়োখন দেশৰ মাজত সম্পৰ্ক উত্তেজিত হৈ পৰিছিল। হাছিনাই ভাৰতত আশ্ৰয় লোৱাৰ মাত্ৰ কেইদিনমানৰ পিছতে ইউনুছে ক্ষমতালৈ আহিছিল।
হিন্দুসকলৰ ওপৰত হোৱা আক্ৰমণ আৰু হিন্দু সাধু চিন্ময় কৃষ্ণ দাসক গ্ৰেপ্তাৰ কৰাৰ পিছত বিগত কেইটামান সপ্তাহত সম্পৰ্ক অধিক অস্থিৰ হৈ পৰে। বাংলাদেশত অন্তৱৰ্তীকালীন চৰকাৰখন ক্ষমতালৈ অহাৰ পিছত ভাৰত চৰকাৰৰ এগৰাকী জ্যেষ্ঠ বিষয়াৰ বাংলাদেশ ভ্ৰমণৰ এইটোৱেই প্ৰথম।
