বাংলাদেশত শ্বেখ হাছিনাই ক্ষমতা ত্যাগ কৰাৰ পিছত বাংলাদেশত হিন্দুসকলৰ বিৰুদ্ধে বৃদ্ধি হৈ গৈ আছে। সংখ্যালঘুৰ বিৰুদ্ধে বৃহৎ পৰিসৰত লুণ্ঠন আৰু আক্ৰমণ সংঘটিত হৈছে। ব্যৱসায়িক প্ৰতিষ্ঠান তথা হিন্দুৰ ঘৰবোৰকো লক্ষ্য কৰি লোৱা হৈছে।
ইফালে এনেধৰণৰ পৰিস্থিতিৰ মাজতে বাংলাদেশত বৃহৎ জোকাৰণিৰ সন্মুখীন হৈছে ইস্কনৰ পুৰোহিত চিন্ময়কৃষ্ণ দাস। বাংলাদেশৰ এখন আদালতে তেওঁৰ জামিন আবেদন নাকচ কৰিছে।
অহা ২ জানুৱাৰীত এই গোচৰৰ শুনানি গ্ৰহণ কৰিব বুলি আদালতে জানিবলৈ দিয়ে। ইয়াৰ পূৰ্বে ২৬ নৱেম্বৰত তেওঁৰ জামিন আবেদন নাকচ কৰিছিল আদালতে। চিন্ময়কৃষ্ণ দাসক ২৫ নৱেম্বৰত দেশদ্ৰোহৰ অভিযোগত গ্ৰেপ্তাৰ কৰা হৈছিল।
চিন্ময়কৃষ্ণ দাসৰ আবেদন নাকচ কৰা হৈছে কাৰণ তেওঁৰ হাতত কোনো অধিবক্তাৰ ফালৰ পৰা আইনী পত্ৰ নাছিল। ইয়াৰ পিছতে বাংলাদেশৰ উচ্চতম ন্যায়ালয়ৰ জ্যেষ্ঠ অধিবক্তা তথা মানৱ অধিকাৰ কৰ্মী ৰবীন্দ্ৰ ঘোষে চিটাগংলৈ গৈ চিন্ময়কৃষ্ণ দাসৰ বাবে আদালতত আবেদন দাখিল কৰে।
ঘোষে যেতিয়া আদালতত আগতীয়া শুনানিৰ বাবে অনুৰোধ জনায় তেতিয়া আন অধিবক্তাই ইয়াৰ বিৰোধিতা কৰি কয় যে, ঘোষৰ হাতত চিন্ময়কৃষ্ণ দাসক প্ৰতিনিধিত্ব কৰিবলৈ কোনো আইনী পত্ৰ (Letter of Attorney) নাই। ইয়াৰ পিছত আদালতে দাসৰ আবেদন নাকচ কৰে।
আচলতে এই গোচৰৰ শুনানি ৩ ডিচেম্বৰত হ’ব লাগিছিল যদিও বিচাৰ বিভাগৰ পৰামৰ্শ মতে, চিন্ময়কৃষ্ণ দাসৰ হৈ কোনো অধিবক্তা হাজিৰ নোহোৱাৰ বাবে আদালতে তাৰিখটো ২০২৫ চনৰ ২ জানুৱাৰীলৈ পিছুৱাই দিয়ে।
