শীতৰ আগমন অৰ্থাৎ ঋতু পৰিবৰ্তনৰ লগে লগে জ্বৰ-চৰ্দিকে ধৰি বিভিন্ন বেমাৰ-আজাৰ হোৱা দেখা যায়। শীতৰ সময়চোৱাত শৰীৰৰ যতন লোৱাটো অতি প্ৰয়োজনীয়। কাৰণ আমাৰ শৰীৰত ঠাণ্ডাই বহু বেলেগ বেলেগ ধৰণে প্ৰভাৱ পেলাব পাৰে।শীতৰ এই সময়চোৱাত আমাৰ ভাইটেল অৰ্গেনসমূহ যেনে- ব্ৰেইন, হাৰ্ট, লিভাৰ, কিডনী আদিত তেজৰ চলাচল বেছি হ’বলৈ প্ৰচেষ্টা বেছি হয়।
ইফালে শীতৰ শুকান বতাহৰ প্ৰভাৱত মুৰৰ চুলিৰ গুৰিবোৰ শুকাই যায় আৰু মুৰত উফি হয়।লগতে চুলি সৰিবলৈ ধৰে। আকৌ শীতত গৰম পানীৰে মুৰ ধোৱাৰ বাবে মুৰৰ ছাল শুকাই যায় আৰু চুলি সৰিবলৈ ধৰে।শীতকালি কেতিয়াবা হাত-ভৰিৰ ছাল আৰু মাংসপেশী টানি ধৰে। হাত-ভৰিত সিৰামুৰি হয়।কাম-কাজ কৰাত অসুবিধা হয়। সেয়েহে অধিক ঠাণ্ডাৰ পৰা ৰক্ষা পাবলৈ শীতকালত হাতমোজা আৰু ভৰিত গৰম মোজা পিন্ধা উচিত।
শীত কালত আমি যথেষ্ঠ পৰিমানে পানী গ্ৰহণ কৰিব লাগে। কাৰণ পানীয়ে আমাৰ শৰীৰ হাইড্ৰেড কৰি ৰাখে। ইয়াৰোপৰি সেউজীয়া শাক-পাচলি, ফল-মূল আদি খোৱাটো দৰকাৰ।
শীতকালি বহু লোকে পেটৰ অসুখত ভোগা দেখা যায়। হজম শক্তি কমি যায়। ভোক নলগা হয়। বিশেষকৈ শিশুৰ ক্ষেত্ৰত ভাইৰাছজনিত ডায়েৰীয়া হোৱা দেখা যায়।শীতকালি শৰীৰৰ আৰ্দ্ৰতা বজাই ৰাখিবলৈ যথেষ্ট পৰিমাণে কুহুমীয়া গৰম পানী গ্ৰহণ কৰিব লাগে।শীতল পানীয় বা চাহ-কফি সৰহকৈ পান কৰিব নালাগে।কাৰণ কেফিন থকা পানীয়বোৰে শৰীৰৰ আৰ্দ্ৰতাৰ হানি কৰিব পাৰে (Dehydration)।তেনেদৰে সুৰা পান কৰিলেও শৰীৰত আৰ্দ্ৰতা কমি যায়।
শীতকালত সকলোৱে নিজকে সৌন্দৰ্য্যবান কৰি ৰাখিব বিছাৰে। বৰ্তমান সময়ত পুৰুষ-মহিলা সকলোৱে নিজৰ সৌন্দৰ্য্যক লৈ যথেষ্ঠ সচেতন হৈ থাকে। গ্ৰীষ্মকালত যিদৰে আমি ছাল-চুলিৰ যত্ন লও,ঠিক তেনেদৰে শীত কালতো আমি আমাৰ ছাল-চুলিৰ যত্ন ল’ব লাগে।
শীতকালত আমাৰ ছালখন কোমল কৰি ৰাখিবৰ বাবে নাৰিকল তেলৰ ব্যৱহাৰ কৰা উচিত। নাৰিকল তেলে আমাৰ ছালখন কোমল কৰাৰ লগতে উজ্জ্বল কৰি ৰাখিব পাৰে।
শীতকালত মৌ আৰু কণী হৈছে কিছুমান সৰ্বশ্ৰেষ্ঠ উপাদান, যি মানুহে যুগ যুগ ধৰি ব্যৱহাৰ কৰি আহিছে। এইবোৰে ছালক সঠিক আৰ্দ্ৰতা প্ৰদান কৰে আৰু ইয়াৰ অন্তিম ফলাফল হৈছে কোমল আৰু উজ্জ্বল ছাল।
শীতকালত আমাৰ ছালক অসাধাৰণভাৱে ধুনীয়া আৰু উজ্জ্বল কৰি তুলিবলৈ দৈ হৈছে উৎকৃষ্ট উপাদান। যদি আপোনাৰ ছাল অত্যাধিক শুকান হয়, তেন্তে আপুনি কলৰ ফেচ পেক প্ৰয়োগ কৰিব পাৰে।
ডায়েবেটিছ ৰোগীসকলে শীতৰ সময়চোৱাত বিশেষভাৱে সাৱধানতা অৱলম্বন কৰাটো অতি প্ৰয়োজনীয়। এজমা ৰোগী সকলে ধোঁৱা, ধূলি আৰু বেছি জন সমাগত হোৱা ঠাইৰ পৰা পাৰিলে আঁতৰি থাকিব লাগে। তেওঁলোকে এনে স্থানত গ’লেও মাস্ক ব্যৱহাৰ কৰিব লাগে।
শীতৰ সময়চোৱাত ছালৰো বিভিন্ন সমস্যা হোৱা পৰিলক্ষিত হয়। সেয়ে এই সময়চোৱাত ছাল হাইড্ৰেট কৰি ৰখাটো অতি প্ৰয়োজনীয়। সময়ে সময়ে পানী খাই থাকিব লাগে। চুলিৰ ক্ষেত্ৰতো গৰম তেলেৰে মালিচ কৰিব লাগে। নিজকে সুস্থ কৰি ৰাখিবলৈ খাদ্যৰ ওপৰতো গুৰুত্ব দিব লাগে। সেউজীয়া শাক-পাচলি, ফল-মূল, প্ৰ’টিন যুক্ত খাদ্য গ্ৰহণ কৰিব লাগিব।
এনেদৰে সকলোৱে শীতকালিৰ উম উপভোগ কৰিবলৈ শাৰীৰিক আৰু মানসিকভাৱে প্ৰস্তুত হ’ব লাগে।প্ৰচুৰ কুহুমীয়া পানী পান কৰি,খোজ কঢ়া,খেলা-ধুলা কৰি শৰীৰৰ সতেজ ৰাখি,বন্ধু-বান্ধৱ আৰু পৰিয়ালৰ লোকৰ সৈতে ৰং মনেৰে কটাই শীতকালি পাৰ কৰিলে বিভিন্ন ৰোগৰ পৰা হাত সাৰি থাকিব পাৰি।
