আজি ২৫ ডিচেম্বৰ। আজিৰ এই পৱিত্ৰ দিনটোতে বিশ্বৰ সকলো খ্ৰীষ্টান ধৰ্মাৱলম্বী লোকসকলে অতি উলহ-মালহেৰে উদযাপন কৰে বৰদিন উৎসৱ। এই উৎসৱ উপলক্ষে প্ৰতিটো গীৰ্জাঘৰ আটক ধুনীয়াকৈ সজাই তোলা হৈছে। ৰাতি ১২ বজাৰ পৰাই ৰাজ্যৰ প্ৰতিটো প্ৰান্তৰ গীৰ্জাঘৰত শুনিবলৈ পোৱা যায় কেৰ’লৰ ধ্বনি।
খ্ৰীষ্টান ধৰ্মীয় লোকসকলৰ বিশ্বাস অনুসৰি, আজিৰ এই দিনটোতে যীশুখ্ৰীষ্টৰ জন্ম হৈছিল । জন্মদিন উপলক্ষে যীশুখ্ৰীষ্টক সেৱা জনাই আজিৰ দিনটোত পালন কৰা হয় বৰদিন।বৰদিনত চৌদিশে বৰ্ণাঢ্য কাৰ্যসূচীৰ আয়োজন কৰা হয়। যীশু খ্ৰীষ্টক প্ৰাৰ্থনা, কেৰ’ল গোৱা ইত্যাদি বিভিন্ন পৰম্পৰাগত ৰীতি–নীতিৰে খ্ৰীষ্টানধৰ্মী লোকসকলে বৰদিন পালন কৰিছে
খ্ৰীষ্টমাছ ট্ৰী, ৰং বিৰঙী তৰাৰে গীৰ্জাঘৰৰ লগতে বাসগৃহসমূহ সজাই তুলিছে খ্ৰীষ্টানধৰ্মী লোকসকলে। মংগলবাৰে খ্ৰীষ্টমাছ ইভৰ নিশা ১২ বজাৰ লগে লগে গীৰ্জাঘৰত শুনিবলৈ পোৱা গৈছে কেৰ’লৰ ধ্বনি। গীৰ্জাঘৰত নিশা উপস্থিত হৈ খ্ৰীষ্টানধৰ্মী লোকে বিভিন্ন ৰীতি–নীতি পালনৰ লগতে প্ৰভু যীশুৰ ওচৰত প্ৰাৰ্থনা জনায়।
অসমত তথা উত্তৰ-পূব ভাৰতৰ আন ৰাজ্যৰো প্ৰতিটো প্ৰান্ততে থকা গীৰ্জাঘৰবোৰ জিলিকাই তোলা হৈছে। ৰঙীন লাইটেৰে সজাই তোলা হৈছে চহৰসমূহ। চৌদিশে উৎসৱমুখৰ পৰিৱেশ দেখা গৈছে।
খ্ৰীষ্টান ধৰ্মীয় লোকসকলৰ বিশ্বাস অনুসৰি, এই তাৰিখৰ ঠিক ন মাহ পূৰ্বে যীশুৱে মেৰীৰ গৰ্ভত প্ৰবেশ কৰিছিল আৰু এই বিশ্বাস অনুসৰি খ্ৰীষ্টানসকলে আজিৰ দিনটো যীশুৰ জন্মদিন হিচাপে পালন কৰে। জেৰুজালেমৰ বেথেলহেমত এটা গোহালিত মাতৃ মেৰীয়ে জন্ম দিছিল যীশুক। লগতে বিশ্বাস কৰা হয় যে, দুষ্টক দমন কৰি শান্তিৰ বাৰ্তা প্ৰেৰণ কৰাৰ বাবে ঈশ্বৰে যীশুক এই পৃথিৱীলৈ পঠিয়াইছিল।
