ভাৰতৰ অন্যতম সন্মানীয় নেতা তথা প্ৰাক্তন প্ৰধানমন্ত্ৰী ড০ মনমোহন সিঙে ২৬ ডিচেম্বৰত শেষ নিশ্বাস ত্যাগ কৰে। বৃহস্পতিবাৰে নিজ ঘৰতে হঠাৎ স্বাস্থ্যৰ অৱনতি ঘটাৰ পিছত তেওঁক দিল্লী এইমছলৈ লৈ যোৱা হয় আৰু পিছত তেওঁক মৃত বুলি ঘোষণা কৰা হয়।
প্ৰাক্তন প্ৰধানমন্ত্ৰীগৰাকীৰ মৃত্যুৰ পিছত দেশবাসী শোকত ভাগি পৰিছে আৰু ছ’চিয়েল মিডিয়াত ৰাজনীতিকৰ লগতে বিভিন্নজনে তেওঁক শ্ৰদ্ধাঞ্জলি জনাইছে। কিছু সংখ্যক লোকে নেতাগৰাকীৰ পুৰণি ফটো শ্বেয়াৰ কৰি স্মৰণ কৰা পৰিলক্ষিত হৈছে।
এখন ছবি পোষ্ট কৰি সামাজিক মাধ্যম এক্সত এজনে লিখিছে, ‘১৯৭৮ :: ইছৰোৰ বিজ্ঞানীসকলক সাক্ষাত কৰাৰ মুহূৰ্তত ড০ মনমোহন সিং।’ ফটোখনত ভাৰতৰ প্ৰাক্তন ৰাষ্ট্ৰপতি এ পি জে আব্দুল কালামো আছে।
এজনে হিন্দী ভাষাত লিখিছে, ‘সৰলতাৰ প্ৰতিমূৰ্তি, প্ৰাক্তন প্ৰধানমন্ত্ৰী মনমোহন সিঙক সন্মান জনোৱাৰ বাবে বিনম্ৰ শ্ৰদ্ধাঞ্জলি। দেশে হেৰুৱালে এজন মহান আৰু দূৰদৰ্শী নেতা।’
পোষ্টটোৰ সৈতে শ্বেয়াৰ কৰা ছবিখনত ড০ সিঙে জোতাৰ ফিটা বান্ধি থকা দেখা গৈছে। এই ফটোখন সেই সময়ৰ যেতিয়া তেওঁ প্ৰাক্তন প্ৰধানমন্ত্ৰী ৰাজীৱ গান্ধীক তেওঁৰ স্মৃতিসৌধ বীৰ ভূমিত শ্ৰদ্ধাঞ্জলি জনায়।
ইফালে আন এজনে ২০০৫ চনত মনমোহন সিঙে ভাৰতীয় সৈনিকক সাক্ষাত কৰিবলৈ ছিয়াচিন বেছ কেম্পলৈ যোৱা কেইবাখনো ফটো প’ষ্ট কৰি লিখিছে, এনেকুৱাও এজন প্ৰধানমন্ত্ৰী।
আন এজন এক্স ব্যৱহাৰকাৰীয়ে এখন ছবি শ্বেয়াৰ কৰি লিখিছে, ‘প্ৰাক্তন প্ৰধানমন্ত্ৰী মনমোহন সিঙৰ মৃত্যু অত্যন্ত দুখজনক। ৯২ বছৰ জীয়াই থকাৰ পিছত তেওঁ এই পৃথিৱীখন এৰি থৈ গ’ল। তেওঁৰ কাৰ্যকালত তেওঁ এই দেশক এক নতুন প্ৰগতিৰ পথ দেখুৱাইছিল!’
পুৰণি ফটোখনত এই দেশৰ দুজন মহান নেতা – ড° মনমোহন সিং আৰু এ পি জে আব্দুল কালামক বন্দী কৰা হৈছে। ছবিখনত দুয়ো কিবা কথাত নিমগ্ন হৈ থকা পৰিলক্ষিত হয়।
উল্লেখ্য যে, বৃহস্পতিবাৰে নিশা প্ৰায় ৯.৫১ মিনিটত দিল্লীৰ এইমছত শেষ নিশ্বাস ত্যাগ কৰিছিল দেশৰ প্ৰাক্তন প্ৰধানমন্ত্ৰী ড০ মনমোহন সিং। বিশ্বৰ অন্যতম মহান অৰ্থনীতিবিদৰূপে পৰিচিত এই ৰাজনীতিবিদগৰাকীৰ মৃত্যুৰ পিছতেই দেশৰ প্ৰধানমন্ত্ৰীৰ লগতে বিভিন্নজনে শোকপ্ৰকাশ কৰিছে।
