বাংলাদেশৰ পদচ্যুত প্ৰধানমন্ত্ৰী শ্বেখ হাছিনাক লৈ বাংলাদেশ আৰু ভাৰতৰ মাজত বৃদ্ধি পাইছে উত্তেজনা। বাংলাদেশৰ অন্তৱৰ্তীকালীন চৰকাৰে ভাৰতৰ পৰা শ্বেখ হাছিনাক প্ৰত্যাৰ্পণৰ দাবী জনাই হাছিনাক জেলত ভৰোৱাৰ বাবে সকলো শক্তি প্ৰয়োগ কৰি আছে।
শ্বেখ হাছিনাৰ বিৰুদ্ধে চলি থকা এই অপৰাধমূলক গোচৰ সন্দৰ্ভত ইউনুছ চৰকাৰে প্ৰথমে তেওঁৰ বাবে গ্ৰেপ্তাৰৰ পৰোৱানা জাৰি কৰে আৰু এতিয়া তেওঁৰ পাছপ’ৰ্টো বাতিল কৰিছে। একে সময়তে ভাৰতে দিল্লীত বাস কৰা নিৰ্বাসিত প্ৰধানমন্ত্ৰী হাছিনাৰ ভিছা বৃদ্ধি কৰিছে। বাংলাদেশৰ অন্তৱৰ্তীকালীন চৰকাৰে শ্বেখ হাছিনাকে ধৰি মুঠ ৯৭জন লোকৰ পাছপ’ৰ্ট বাতিল কৰিছে।
শ্বেখ হাছিনাৰ উপৰিও বাংলাদেশে ৯৬ জন লোকৰো পাছপ’ৰ্ট বাতিল কৰিছে, য’ত ২২ জন লোকৰ বিৰুদ্ধে অপহৰণৰ অভিযোগ উত্থাপন হৈছে। আৰু আন ৭৫ জন লোকৰ বিৰুদ্ধে বিগত বৰ্ষৰ ছাত্ৰ বিৰোধী আন্দোলনৰ সময়ত হত্যাৰ অভিযোগো আছে।
বাংলাদেশৰ অন্তৱৰ্তীকালীন চৰকাৰে পাছপ’ৰ্ট বাতিল কৰাৰ এই সিদ্ধান্ত আন্তঃৰাষ্ট্ৰীয় অপৰাধ ন্যায়াধিকৰণে শ্বেখ হাছিনা আৰু আন ১১জন লোকৰ বিৰুদ্ধে গ্ৰেপ্তাৰৰ পৰোৱানা জাৰি কৰাৰ এদিন পিছতে আহিছে। আইচিটিয়ে শ্বেখ হাছিনা আৰু অন্যান্য অভিযুক্তক গ্ৰেপ্তাৰ কৰি অহা ১২ ফেব্ৰুৱাৰীৰ ভিতৰত আদালতত হাজিৰ কৰিবলৈ নিৰ্দেশ দিছে।
ইয়াৰ ভিতৰত আছে মেজৰ জেনেৰেল (অৱসৰপ্ৰাপ্ত) তাৰিক আহমেদ ছিদ্দিকী, যি হাছিনাৰ প্ৰতিৰক্ষা উপদেষ্টা আছিল, প্ৰাক্তন আৰক্ষী মহাপৰিদৰ্শক (আই জি পি) বেনজিৰ আহমেদ আৰু ৰাষ্ট্ৰীয় দূৰসংযোগ নিৰীক্ষণ কেন্দ্ৰৰ প্ৰাক্তন সঞ্চালক প্ৰধান জিয়াউল আহছান ইত্যাদি।
শ্বেখ হাছিনাৰ প্ৰত্যাৰ্পণৰ দাবীৰ মাজতে ভাৰতে এটা ডাঙৰ সিদ্ধান্ত লৈ হাছিনাৰ ভিছা বৃদ্ধি কৰিছে। যোৱা আগষ্ট মাহৰ পৰাই শ্বেখ হাছিনাই ভাৰতত বাস কৰি আহিছে, সেই সময়তে বাংলাদেশত ছাত্ৰ-ছাত্ৰীয়ে তেওঁৰ বিৰুদ্ধে প্ৰতিবাদ সাব্যস্ত কৰি দেশ এৰি যাবলগীয়া হৈছিল। খবৰ অনুসৰি ভাৰত চৰকাৰে শ্বেখ হাছিনাৰ ভিছা বৃদ্ধি কৰিছে যাতে তেওঁ ইয়াত থাকিব পাৰে, কিন্তু ভাৰতত শৰণাৰ্থীৰ বাবে বিশেষ আইন নথকাৰ বাবে তেওঁক আশ্ৰয় দিয়া নাই।
ইয়াৰ পূৰ্বে বাংলাদেশৰ অন্তৱৰ্তীকালীন চৰকাৰে শ্বেখ হাছিনাৰ প্ৰত্যাৰ্পণৰ বাবে ২৩ ডিচেম্বৰত ভাৰতৰ বৈদেশিক পৰিক্ৰমা মন্ত্ৰালয়লৈ কূটনৈতিক বাৰ্তা প্ৰেৰণ কৰিছিল। যাৰ প্ৰতি ভাৰত চৰকাৰে কোনো ইতিবাচক সঁহাৰি নিদিলে।
