আজি পুৱা ৮ বজাৰ পৰা দিল্লী নিৰ্বাচনৰ ভোটগণনা আৰম্ভ হ’ব। শনিবাৰে সন্ধিয়াৰ ভিতৰত সম্পূৰ্ণ হ’বলগীয়া ভোটগণনাৰ পিছতে জানিব পৰা যাব দিল্লীৰ ৭০খন আসনৰ পৰিস্থিতি।
এগজিট প’লত যি ছবি ওলাব, তাৰ পিছতেই সন্ধিয়ালৈকে ফলাফল ওলাব যে কোনে দিল্লীত চৰকাৰ গঠন কৰিব।
জনপ্ৰতিনিধিত্ব আইন, ১৯৫১ৰ ৬৪ নং ধাৰাত কোৱা হৈছে যে, সংশ্লিষ্ট সমষ্টিৰ ৰিটাৰ্নিং অফিচাৰ (আৰ অ’)ৰ তত্বাৱধানত ভোটগণনা হ’ব। কোনো এটা অঞ্চলত নিৰ্বাচন অনুষ্ঠিত কৰাৰ দায়িত্বও আছে আৰ অ’ৰ। নিৰ্বাচনত সংশ্লিষ্ট জিলাৰ জিলা দণ্ডাধীশক ৰিটাৰ্নিং অফিচাৰ কৰা হয়। যদি এখন জিলাত এটাতকৈ অধিক সমষ্টি থাকে, তেন্তে আন চৰকাৰী কৰ্মচাৰীক নিৰ্বাচনী বিষয়া বনাব পাৰি। ৰাজ্য চৰকাৰৰ পৰামৰ্শমতে, নিৰ্বাচন আয়োগে নিৰ্বাচিত কৰে।
ভোট গণনাৰ তাৰিখ নিৰ্বাচন আয়োগে নিৰ্ধাৰণ কৰে। কিন্তু ভোট গণনা ক’ত হ’ব সেইটো নিৰ্ণয় কৰাটো ৰিটাৰ্ণিং অফিচাৰৰ কাম। সাধাৰণতে বেছিভাগ অঞ্চলতে এটা গণনা স্থান থাকে। যেনে- নিৰ্বাচনী বিষয়াৰ মুখ্য কাৰ্যালয়, যিটো সাধাৰণতে জিলা সদৰ। কটকটীয়া নিৰাপত্তা বেষ্টনীৰ অধীনত ভোটগণনা কৰা হয়।
ভোটদানৰ পিছত ইভিএমসমূহ ষ্ট্ৰং ৰুমত ৰখা হয়। কটকটীয়া নিৰাপত্তা থাকে যদিও গণনাৰ দিনটোত প্ৰতিনিধি প্ৰাৰ্থীৰ উপস্থিতিত গণনা স্থানত খুলি দিয়া হয়। ইয়াৰ পিছত আৰ অ’ৰ তত্বাৱধানত তেওঁ নিযুক্তি দিয়া গণনা তত্বাৱধায়কসকলে ভোট গণনা আৰম্ভ কৰে।
গণনাৰ সময়ত যেতিয়া ১৪টা ইভিএমত দিয়া সকলো ভোট গণনা কৰা হয়, তেতিয়া ইয়াক এটা ৰাউণ্ড বা এটা চক্ৰ হিচাপে গণ্য কৰা হয়। এইদৰে সমগ্ৰ ভোটগণনাতে কেইবাটাও ৰাউণ্ড হয়। প্ৰতিটো ৰাউণ্ডৰ ফলাফলৰ লগতে কোনজন প্ৰাৰ্থীয়ে আগবাঢ়ি আছে সেয়াও কোৱা হয়।
ভোটগণনা সম্পূৰ্ণ হোৱাৰ পিছত ৰিটাৰ্ণিং অফিচাৰে ফলাফল ঘোষণা কৰে। ইয়াৰ পিছত তেওঁ বিজয়ী প্ৰাৰ্থীক প্ৰমাণ পত্ৰ দিয়ে। ভোট গণনাৰ সময়ত নিৰ্বাচন আয়োগৰ ৱেবছাইটতো এই পৰিসংখ্যা আপডেট দি থাকে।
