হায়দৰাবাদৰ চাৰমিনাৰৰ সমীপৰ এটা অট্টালিকাত ভয়ংকৰ অগ্নিকাণ্ডৰ ঘটনা সংঘটিত হৈছে। এই অগ্নিকাণ্ডত ১৭ গৰাকী লোকৰ মৃত্যু হোৱাৰ লগতে আন কেইবাজনো লোক আহত হয়।
অগ্নিকাণ্ড সংঘটিত হোৱা অট্টালিকাটো হায়দৰাবাদৰ মীৰ চক অঞ্চলৰ বুলি জানিব পৰা গৈছে। কি কাৰণত এই অগ্নিকাণ্ড সংঘটিত হৈছে সেই কথা এতিয়ালৈ জানিব পৰা হোৱা নাই।
অগ্নিনিৰ্বাপক বাহিনীৰ এগৰাকী বিষয়াই জানিব দিয়া তেওঁ ৰাতিপুৱা প্ৰায় ৬.৩০ বজাত অগ্নিকাণ্ড সংঘটিত হোৱাৰ খবৰ লাভ কৰিছিল। ইয়াৰ পিছতেই অগ্নিনিৰ্বাপক বাহিনীৰ দল ঘটনাস্থলত উপস্থিত হয়।
এই ঘটনাক লৈ শোক প্ৰকাশ কৰিছে কেন্দ্ৰীয় মন্ত্ৰী জি কিষাণ ৰেড্ডীয়ে। এনে ঘটনা অতি দুখজনক বুলিও তেওঁ কয়। কেন্দ্ৰীয় চৰকাৰ আৰু প্ৰধানমন্ত্ৰী মোদীৰ সৈতে কথা পাতি এই ঘটনাত নিহতসকলৰ পৰিয়ালক আৰ্থিক সাহায্য প্ৰদানৰ বাবেও যৎপৰোনাস্তি চেষ্টা কৰাৰ আশ্বাস প্ৰদান কৰে।
ইফালে এই ঘটনাক লৈ শোক প্ৰকাশ কৰিছে মুখ্যমন্ত্ৰী ৰেৱন্ত ৰেড্ডীয়ে। তেওঁ কয় যে তেওঁ বিষয়াসকলক সাহায্যৰ কাম ক্ষিপ্ৰতাৰে কৰিবলৈ আৰু আহতসকলৰ উন্নত তথা উত্তম চিকিৎসা নিশ্চিত কৰিবলৈ আহ্বান জনায়।
আনহাতে প্ৰধানমন্ত্ৰী নৰেন্দ্ৰ মোদীৰ কাৰ্যালয়ে এই ঘটনাৰ দুখ প্ৰকাশ কৰি নিহতসকলৰ আত্মীয়ক ২ লাখ টকাকৈ আৰু আহতসকলক ৫০ হাজাৰ টকাকৈ এককালীন আৰ্থিক সাহায্য প্ৰদানৰ কথা ছ’চিয়েল মিডিয়াযোগে ঘোষণা কৰে।
উল্লেখ্য যে, আৰক্ষী আৰু অগ্নিনিৰ্বাপক বাহিনীৰ প্ৰাথমিক তদন্তত শ্বৰ্ট চাৰ্কিটৰ ফলত এই অগ্নিকাণ্ড সংঘটিত হোৱা বুলি আশংকা কৰিছে।
