জাপানৰ প্ৰধানমন্ত্ৰী শ্বিগেৰু ইছিবাই নিজৰ পদবীৰ পৰা অতি শীঘ্ৰে পদত্যাগ কৰিব। দেওবাৰে এক অনুষ্ঠানত অংশ লৈ এই ইংগিত প্ৰদান কৰিছে প্ৰধানমন্ত্ৰী ইছিবাই।
নিজৰ দলৰ ভিতৰচ’ৰাত বৃদ্ধি পোৱা সমালোচনা, অসন্তুষ্টি আৰু জুলাইত অনুষ্ঠিত হৈ যোৱা সংসদীয় নিৰ্বাচনত শোচনীয় পৰাজয়ৰ বাবেই এই সিদ্ধান্ত লোৱা বুলি বিভিন্ন সংবাদ মাধ্যমত প্ৰকাশ পাইছে।
২০২৪ চনৰ অক্টোবৰ মাহত প্ৰধানমন্ত্ৰীৰূপে দায়িত্ব গ্ৰহণ কৰিছিল ইছিবাই। কিন্তু বিগত এমাহ ধৰি তেওঁ প্ৰধানমন্ত্ৰী পদৰ পৰা পদত্যাগ কৰিব লাগে বুলি সোঁপন্থীয়ে হেচা প্ৰয়োগ কৰি আহিছিল। সংসদীয় নিৰ্বাচনত পৰাস্ত হোৱাৰ দায়িত্ব স্বীকাৰ কৰি পদবীৰ পৰা পদত্যাগ কৰিব লাগে বুলি কৰা এই হেচাক আওকাণ কৰি তেওঁ নিজৰ দায়িত্ব পালন কৰি গৈছিল।
প্ৰধানমন্ত্ৰী পদৰ পৰা কেতিয়া পদত্যাগ কৰিব সেই কথা ঘোষণা কৰা নাই যদিও ইছিবাৰ এই সিদ্ধান্ত আন্তঃৰাষ্ট্ৰীয় প্ৰেক্ষাপটত যথেষ্ট চৰ্চাৰ বিষয় হৈ পৰিছে।
