ইণ্ডিৰা গান্ধীয়ে ঘোষণা কৰা জৰুৰীকালীন অৱস্থাক লৈ শাসক-বিৰোধীৰ মাজত চলি থকা বিতৰ্কৰ মাজতে নৰেন্দ্ৰ মোদী নেতৃত্বাধীন কেন্দ্ৰীয় চৰকাৰে কৰিছে এক ডাঙৰ ঘোষণা। গৃহমন্ত্ৰী অমিত শ্বাহে আজি এক্সযোগে কৰা ঘোষণা অনুসৰি এতিয়াৰে পৰা প্ৰতিবছৰে ২৫ জুন তাৰিখটো ‘সংবিধান হত্যা দিৱস’ হিচাপে পালন কৰা হ’ব।
১৯৭৫ চনৰ ২৫ জুনত দেশত জৰুৰীকালীন অৱস্থা ঘোষণা কৰা হৈছিল আৰু লাখ লাখ লোকক কাৰাৰুদ্ধ কৰা হৈছিল বুলিও এক্সযোগে উল্লেখ কৰে অমিত শ্বাহে।
শ্বাহে লগতে কয় যে ১৯৭৫ চনৰ জৰুৰীকালীন অৱস্থাৰ সময়ত অমানৱীয় যন্ত্ৰণা সহ্য কৰা সকলোৰে মহৎ অৱদানক ‘সংবিধান হত্যাকাণ্ড দিৱস’ৰ দিনটোত স্মৰণ কৰা হ’ব।
এই সন্দৰ্ভত তেওঁ এক্সযোগে লিছিছে, ‘ভাৰত চৰকাৰে প্ৰতি বছৰে ২৫ জুন তাৰিখক ‘সংবিধান হত্যা দিৱস’ হিচাপে পালন কৰাৰ সিদ্ধান্ত লৈছে। ১৯৭৫ চনৰ জৰুৰীকালীন অৱস্থাৰ অমানৱীয় যন্ত্ৰণা সহ্য কৰা সকলোৰে মহান অৱদানক এই দিনটোত স্মৰণ কৰা হ’ব’।
ভাৰত চৰকাৰৰ তৰফৰ পৰা ২৫ জুনক ‘সংবিধান হত্যা দিৱস’ হিচাপে উদযাপন কৰিবলৈ এক অধিসূচনাও জাৰি কৰা হৈছে।
