ভাৰতীয় জনতা পাৰ্টীৰ জ্যেষ্ঠ নেতা তথা দেশৰ প্ৰাক্তন উপ-প্ৰধানমন্ত্ৰী লালকৃষ্ণ আদৱানীৰ স্বাস্থ্যৰ পুনৰ অৱনতি ঘটিছে। ৮ দিনৰ ভিতৰত দ্বিতীয়বাৰৰ বাবে হাস্পতালত ভৰ্তি কৰোৱা হৈছে নেতাজনক।
প্ৰথমবাৰ এইমছত ভৰ্তি কৰোৱা হৈছিল যদিও এইবাৰ তেওঁক দিল্লীৰ এপল’ হাস্পতালত ভৰ্তি কৰোৱা বুলি জানিব পৰা গৈছে। অৱশ্যে বৰ্তমান তেওঁৰ স্বাস্থ্য সুস্থিৰ।
বুধবাৰে নিশা হঠাতে অসুস্থ হৈ পৰাৰ বাবে ভাৰত ৰত্ন লালকৃষ্ণ আদৱানীক এপল’ হাস্পতালত ভৰ্তি কৰোৱা হয়। জ্যেষ্ঠ স্নায়ু বিশেষজ্ঞ ডাঃ বিনীত ছুৰিৰ তত্বাৱধানত চিকিৎসাধীন হৈ আছে প্ৰাক্তন উপ-প্ৰধানমন্ত্ৰীগৰাকী।
আগশাৰীৰ নিউজ এজেন্সি এটাৰ প্ৰতিবেদন অনুসৰি, প্ৰাক্তন উপ-প্ৰধানমন্ত্ৰীগৰাকী কি ৰোগত আক্ৰান্ত সেই কথা এতিয়াও জানিব পৰা হোৱা নাই।
উল্লেখ্য যে, বিগত সপ্তাহৰ আৰম্ভণিতে ৯৬ বছৰীয়া নেতাগৰাকীৰ স্বাস্থ্যৰ অৱনতি ঘটিছিল। তাৰ পিছত বাৰ্ধক্যজনিত অসুস্থতাৰ বাবে দিল্লীৰ অল ইণ্ডিয়া ইনষ্টিটিউট অৱ মেডিকেল ছায়েন্স (এইমছ)ত ভৰ্তি কৰোৱা হৈছিল প্ৰাক্তন উপ-প্ৰধানমন্ত্ৰীগৰাকীক। ২৬ জুনৰ নিশা প্ৰায় ১০.৩০ বজাত তেওঁক এইমছৰ ইউৰ’লজী বিভাগত ভৰ্তি কৰোৱা হৈছিল।
অৱশ্যে হাস্পতালত এদিন কটোৱাৰ পিছতেই তেওঁক ২৭ জুনত ঘৰলৈ যাব দিয়া হৈছিল।
