উত্তৰ-পূব ভাৰতৰ প্ৰায় কেইখন ৰাজ্যৰ দৰে অসমৰ চুবুৰীয়া ৰাজ্য মিজোৰামতো বিগত কিছুদিনৰ পৰা অব্যাহত আছে ধাৰাসাৰ বৰষুণ। এই প্ৰতিকূল পৰিস্থিতিৰ প্ৰতি লক্ষ্য ৰাখি মঙলবাৰে মিজোৰামৰ সকলো বিদ্যালয় বন্ধ ৰখাৰ কথা ঘোষণা কৰিছে ৰাজ্যখনৰ চৰকাৰে।
প্ৰাপ্ত খবৰ অনুসৰি, প্ৰচণ্ড বৰষুণৰ বাবে হোৱা ভূমিস্খলনৰ ফলত আইজলৰ চানমাৰী আৰু ৰামহলুন এলেকাৰ মাজৰ এটা ব্যস্ত পথ খহি যোৱাৰ বাবে সম্পূৰ্ণৰূপে বন্ধ হৈ পৰিছে। ইয়াৰ পূৰ্বে বিগত ১ জুলাইত আইজলৰ চৰকাৰী জিৰতিৰি আৱাসিক বিজ্ঞান মহাবিদ্যালয়ে যাতায়াতৰ সমস্যা আৰু ভূমিস্খলনৰ প্ৰতি লক্ষ্য ৰাখি পাঠদান স্থগিত ৰখাৰ কথা ঘোষণা কৰিছিল।
অৱশ্যে ৫ জুলাইৰ পৰা পাঠদান পুনৰ আৰম্ভ হ’ব বুলি ইতিমধ্যেই মহাবিদ্যালয় প্ৰশাসনে সংবাদ মাধ্যমৰ আগত প্ৰকাশ কৰিছে। তদুপৰি শিক্ষাৰ্থী আৰু কৰ্মচাৰীৰ সুৰক্ষাক অগ্ৰাধিকাৰ দিয়াৰ স্বাৰ্থত নিয়মীয়া শ্ৰেণীবোৰ ৮ জুলাইৰ পৰা আৰম্ভ হ’ব।
আনফালে আইজলৰ চালেম ভেঙৰ স্থানীয় পৰিষদে বতৰৰ বাবে ২০টাকৈ পৰিয়ালক সুৰক্ষিত অঞ্চললৈ স্থানান্তৰিত হ’বলৈ পৰামৰ্শ দিছে।
উল্লেখ্য যে মিজোৰাম চৰকাৰে বহু কেইখন জিলাত সম্ভাৱ্য ধাৰাসাৰ বৰষুণ আৰু সম্পৰ্কিত বিপদাশংকাৰ প্ৰতি লক্ষ্য ৰাখি নাগৰিক সকলক সতৰ্ক কৰাৰ বাবে এখন ৰাজহুৱা জাননী জাৰি কৰিছে। ইফালে ভাৰতীয় বতৰ বিজ্ঞান বিভাগেও অঞ্চলটোত তীব্ৰ বৰষুণ হোৱাৰ সম্ভাৱনাৰ প্ৰতি লক্ষ্য ৰাখি জনতাক সতৰ্ক হৈ থাকিবলৈ আহ্বান জনাইছে।
