কৰিমগঞ্জৰ অসম-ত্ৰিপুৰা সংযোগী ৮ নং ৰাষ্ট্ৰীয় ঘাইপথত ভয়ংকৰ পথ দুৰ্ঘটনা সংঘটিত হৈছে। দুৰ্ঘটনাত থিতাতে নিহত হয় শিশুসহ ৫ জনকৈ লোকৰ। আনহাতে, দুৰ্ঘটনাত গুৰুতৰভাৱে আহত হয় কেইবাজনো লোক।
কৰিমগঞ্জ জিলাৰ নিলামবজাৰ থানা এলেকাৰ বেৰাজালত সংঘটিত হয় এই দুৰ্ঘটনা। এখন অট’ৰিক্সা আৰু হুণ্ডাই ভ্যেনু বাহনৰ মাজত হোৱা মুখামুখি সংঘৰ্ষৰ ফলতেই সংঘটিত হয় এই কৰুণ ঘটনা।
দুৰ্ঘটনাগ্ৰস্ত অট’ৰিক্সাখনৰ নম্বৰ হৈছে এএছ-১০বিচি-২০৬১ আৰু ভ্যেনু গাড়ীখনৰ নম্বৰ হৈছে এছ-১১এছ-৮৩২৩।
এই দুৰ্ঘটনাৰ ফলত ঘটনাস্থলীতে দুয়োখন বাহনত থকা মুঠ ৫ জন লোকৰ প্ৰাণ যোৱাৰ লগতে গুৰুতৰভাৱে আহত হয় আন কেইবাজনো লোক। তেওঁলোকক সংকটজনক অৱস্থাত কৰিমগঞ্জ অসামৰিক চিকিৎসালয়ত ভৰ্তি কৰোৱা হয়।
ঘটনাস্থলীত নিলামবজাৰ আৰক্ষী উপস্থিত হৈ মৃতদেহকেইটা মৰণোত্তৰ পৰীক্ষাৰ বাবে কৰিমগঞ্জ অসামৰিক চিকিৎসালয়লৈ প্ৰেৰণ কৰে।
ইফালে, দুৰ্ঘটনা সংঘটিত কৰি দুয়োখন বাহন বাগৰি পৰে পথৰ দাঁতিত থকা পথাৰত। এই ঘটনাৰ পাছতেই উত্তেজিত ৰাইজে কিছু সময়ৰ বাবে অসম-ত্ৰিপুৰা সংযোগী ৮ নম্বৰ ৰাষ্ট্ৰীয় ঘাইপথ অৱৰোধ কৰে। পৰৱৰ্তীসময়ত জিলা আয়ুক্ত মৃদুল যাদৱৰ উপস্থিতিত পথ মুকলি কৰি দিয়ে উত্তেজিত লোকে।
