মণিপুৰ আৰক্ষী আৰু নিৰাপত্তা বাহিনীয়ে যোৱা ২৪ ঘন্টাত বিভিন্ন প্ৰান্তত চলোৱা অভিযানত কেইবাটাও উগ্ৰপন্থী সংগঠনৰ কেডাৰ বুলি অভিযোগ উত্থাপন কৰি ১২ জন লোকক গ্ৰেপ্তাৰ কৰে।
আৰক্ষীয়ে জনোৱা মতে, থৌবাল জিলাৰ লিলং আৰক্ষী থানাৰ অন্তৰ্গত লিলং নুংগেই অঞ্চলত এজন উগ্ৰপন্থীক গ্ৰেপ্তাৰ কৰা হয়। বিষ্ণুপুৰ জিলাৰ নিংথৌখং ৱাৰ্ড নং ৩ এলেকাত চলোৱা আন এক অভিযানত আন এজন উগ্ৰপন্থীকো আটক কৰা হয়।
আন এক সুকীয়া অভিযানত ৰাজ্যখনৰ আৰক্ষীয়ে ইম্ফল পূৱ জিলাৰ কৈৰেংগেই কাবুই খুল গেটৰ পৰা দুজন উগ্ৰপন্থীক গ্ৰেপ্তাৰ কৰে।
ইফালে টেংনৌপাল জিলাৰ ইয়ংখুল গাঁৱৰ পৰা বিভিন্ন সংগঠনৰ সৈতে জড়িত সাতজন সক্ৰিয় কেডাৰক গ্ৰেপ্তাৰ কৰে নিৰাপত্তা বাহিনীয়ে। থৌবাল জিলাৰ ৱাংবালৰ পৰাও আন এজন উগ্ৰপন্থীক গ্ৰেপ্তাৰ কৰে নিৰাপত্তা বাহিনীয়ে।
