বিগত প্ৰায় এটা বছৰে মণিপুৰৰ ঘটনাই উত্তাল কৰি ৰাখিছে কেন্দ্ৰীয় সদন। ৰাজ্যখনৰ হিংসাত্মক ঘটনাক লৈ চৰকাৰী পক্ষৰ মৌনতাৰ বিপৰীতে বিৰোধী পক্ষই প্ৰায়েই ইয়াক এটা ৰাজনৈতিক ইচ্ছু হিচাপে ব্যৱহাৰ কৰি আহিছে। এই সন্দৰ্ভত কেন্দ্ৰীয় নেতাসকলৰ দৃষ্টি আকৰ্ষণ কৰি মণিপুৰৰ কংগ্ৰেছ সাংসদ ড° আংগোমচা বিমোল আকয়জামে দাবী কৰে যে মণিপুৰ সংকটক লৈ কেন্দ্ৰীয় চৰকাৰৰ নীৰৱতা কোনো অনন্য ঘটনা নহয়। বৰঞ্চ ই ঔপনিৱেশিক ধাৰাবাহিকতাৰ প্ৰতিফলন।
ইনাৰ মণিপুৰ সংসদীয় সমষ্টিৰ নৱ নিৰ্বাচিত সাংসদ ড° আংগোমচা আকয়জামে সোমবাৰে ধন্যবাদ প্ৰস্তাৱ গ্ৰহণ কৰাৰ সময়ত সংসদত মণিপুৰৰ সংকট সম্পৰ্কে উদ্বেগ প্ৰকাশ কৰে। প্ৰধানমন্ত্ৰীৰ নীৰৱতা আৰু মণিপুৰ সংকট সন্দৰ্ভত ৰাষ্ট্ৰপতি গৰাকীয়েও ভাষণত কোনো কথা উত্থাপন নকৰাক ক্ষোভ প্ৰকাশ কৰি সাংসদগৰাকীয়ে কয় যে এই নীৰৱতা স্বাভাৱিক নহয়। এয়া বহু বিজ্ঞ লোকে কোৱাৰ দৰে ঔপনিৱেশিক কালৰ অৱসান হোৱাৰ পিছতো ঔপনিৱেশিকৰ ধাৰাবাহিকতা অক্ষুণ্ণ থকাৰ লক্ষণ।
ৰাজ্যখনৰ লোকসকলে যি বেদনা আৰু যন্ত্ৰণাৰ মাজেৰে পাৰ হৈ আহিছে তাৰ ওপৰত আলোকপাত কৰি সাংসদ গৰাকীয়ে কয় যে বিগত দিনবোৰত ৬০,০০০ তকৈও অধিক লোক গৃহহীন হৈছে তথা ২০০ জন লোকে প্ৰাণ হেৰুৱাইছে আছে সেয়া কোনো কৌতুক নহয়। ৰাজ্যখনত গৃহযুদ্ধৰ দৰে পৰিস্থিতিৰ সৃষ্টি হৈছে য’ত জনতা অস্ত্ৰ হাতত তুলি ল’বলৈ বা ইজনে সিজনৰ সৈতে যুঁজ দিবলৈ আৰু নিজৰ গাওঁবোৰ ৰক্ষা কৰিবলৈ বাধ্য। কিন্তু বাকী ভাৰতীয় ৰাজ্য সমূহ এতিয়াও নীৰৱ দৰ্শক হিচাপে থিয় হৈ আছে।
আংগোমচা বিমোলে লগতে কয়, ‘মণিপুৰ এতিয়া দেশৰ আটাইতকৈ অধিক সেনা অধ্যুষিত অঞ্চল য’ত সশস্ত্ৰ আৰক্ষী তথা সশস্ত্ৰ বাহিনীৰ লোকৰ সংখ্যা অসামৰিক আৰক্ষীতকৈ অধিক। কিন্তু তৎস্বত্ত্বেও কেনেকৈ ৬০,০০০তকৈও অধিক লোক গৃহহীন হোৱাৰ উপৰি হাজাৰ-হাজাৰ ঘৰ ধ্বংস হ’ল তাক লৈ প্ৰশ্ন উত্থাপন হৈছে। অথচ আজিও আমাৰ প্ৰধানমন্ত্ৰী নীৰৱ হৈ আছে আৰু ৰাষ্ট্ৰপতি গৰাকীয়েও নিজৰ ভাষণত মণিপুৰৰ কোনো কথা উল্লেখ নকৰিলে। প্ৰধানমন্ত্ৰী আৰু ৰাষ্ট্ৰীয়তাবাদী দল সমূহে যদিহে এবাৰকৈ কয় যে মণিপুৰ ভাৰতৰ অংশ আৰু আমি ৰাজ্যখনৰ জনসাধাৰণৰ বাবে চিন্তা কৰোঁ তেন্তে সেইখিনি সময় মই মনে মনে থাকিম।’
অশোক চক্ৰ প্ৰাপ্ত মেজৰ লাইশ্ৰাম জোটিন, বীৰ চক্ৰ প্ৰাপ্ত নগাংগোম জয়দত্ত, মেৰী কম, কুঞ্জৰানী, লাইশ্ৰাম সৰিতা, মীৰাবাঈ চানু, ৰতন থিয়াম, অৰিবাম শ্যাম শৰ্মাৰ দৰে বিভিন্ন ক্ষেত্ৰত আগবঢ়োৱা মণিপুৰী লোক সকলৰ অৱদানৰ কথা স্মৰণ কৰি সাংসদ গৰাকীয়ে লগতে প্ৰকাশ কৰে যে মণিপুৰৰ সংকটৰ বিষয়ে চিন্তা নকৰি কেন্দ্ৰীয় চৰকাৰে ৰাজ্যখনৰ জনতাক অসন্মান কৰিছে।
বিমোলে চৰকাৰী পক্ষক হৃদয়ত হাত থৈ এই সংকটৰ সময়ত বিধৱা হোৱা মহিলা আৰু ৬০,০০০ গৃহহীন লোকৰ কথা চিন্তা কৰিবলৈ আহ্বান জনাই কয় যে এনে কাম কৰাৰ পিছতহে নিজক ৰাষ্ট্ৰীয়তাবাদী বুলি দাবী কৰাৰ বাবে আপোনালোকৰ নৈতিক অধিকাৰ থাকিব।
