আজি সদনত মণিপুৰ সম্পৰ্কে মন্তব্য কৰিবলৈ গৈ প্ৰধানমন্ত্ৰী মোদীয়ে দাবী কৰে যে যদি বিগত পাঁচ বছৰত বিজেপি চৰকাৰে উত্তৰ-পূবৰ বাবে যিমান কাম কৰিছে সিমান কাম কোনো পুৰণি চৰকাৰে কৰিবলৈ সক্ষম হোৱা নাই।
প্ৰধানমন্ত্ৰী মোদীয়ে কয় যে উত্তৰ-পূবত স্থায়ী শান্তিৰ বাবে আলোচনাতকৈ বেছি নিৰন্তৰ প্ৰচেষ্টাৰ দ্বাৰা বাস্তৱ সমাধান উলিওৱাৰ চেষ্টা কৰা হৈছে। ৰাজ্যসমূহৰ মাজত বুজাবুজিৰ মাধ্যমেৰে সীমান্ত বিবাদ শেষ কৰিবলৈ চেষ্টা কৰা হৈছে। মণিপুৰক লৈ আমি সদনত ইতিমধ্যেই দীঘলীয়াকৈ কথা পাতিছো।
আজি মই সেই কথাৰ পুনৰাবৃত্তি কৰিব বিচাৰো যে চৰকাৰে মণিপুৰৰ পৰিস্থিতি স্বাভাৱিক কৰিবলৈ নিৰন্তৰ চেষ্টা কৰি আছে। তাত ১১ হাজাৰতকৈ অধিক এফআইআৰ পঞ্জীয়ন কৰা হৈছে আছে আৰু ৫০০ৰো অধিক লোকক গ্ৰেপ্তাৰ কৰা হৈছে।
উল্লেখ্য যে মণিপুৰত হিংসাত্মক ঘটনা প্ৰায় হ্ৰাস পাবলৈ ধৰিছে অৰ্থাৎ শান্তিৰ আশা কৰা সম্ভৱ। আজি মণিপুৰত বিদ্যালয়সমূহ সদায়ৰ দৰে চলি আছে আৰু কাৰ্যালয়বোৰো খোলা আছে। প্ৰধানমন্ত্ৰী মোদীৰ মতে কেন্দ্ৰীয় আৰু ৰাজ্য চৰকাৰে সকলোৰে সৈতে কথা পাতি শান্তি পুনৰুদ্ধাৰৰ চেষ্টা কৰি আছে। পূৰ্বৰ চৰকাৰবোৰৰ দিনত এনে কাম হোৱা নাছিল।
গৃহমন্ত্ৰী অমিত শ্বাহ আৰু গৃহ ৰাজ্যিক মন্ত্ৰীগৰাকী কেইবাদিনো মণিপুৰত আছিল আৰু চৰকাৰী বিষয়াসকল নিয়মীয়াকৈ তালৈ যায় তথা সমস্যাটো সমাধানৰ বাবে সকলো প্ৰচেষ্টা কৰা হৈছে বুলি দাবী কৰি ভাষণৰ আৰম্ভণিতে মোদীয়ে কয় যে দহ বছৰ দেশক সেৱা কৰাৰ বাবে জনসাধাৰণে তেওঁক তৃতীয়বাৰৰ বাবে শাসন কৰাৰ সুযোগ দিছে। এয়া দেশৰ জনসাধাৰণৰ আশীৰ্বাদ। সংসদীয় পৰম্পৰাত এখন চৰকাৰে বহু দশকৰ পিছত তৃতীয়বাৰৰ বাবে সুযোগ পাইছে। এই নিৰ্বাচনত দেশবাসীয়ে প্ৰদৰ্শনক অগ্ৰাধিকাৰ দিছে তথা বিভ্ৰান্তি আৰু মিছাৰ ৰাজনীতিক প্ৰত্যাখ্যান কৰিছে তথা বিশ্বাসৰ ৰাজনীতিত মোহৰ মাৰিছে।
