আমেৰিকাত বৃহৎ বিপৰ্যয়ৰ সন্মুখীন হৈছে আদানী গ্ৰুপ। ভাৰতীয় উদ্যোগপতি গৌতম আদানীৰ বিৰুদ্ধে গুৰুতৰ অভিযোগ উত্থাপন কৰিছে আমেৰিকান প্ৰচিকিউটৰে।গৌতম আদানীকে ধৰি ৭জন লোকৰ বিৰুদ্ধে ২ বিলিয়ন ডলাৰৰ প্ৰৱঞ্চনা আৰু উৎকোচৰ অভিযোগ উত্থাপিত হৈছে।
নিউয়ৰ্কৰ ব্ৰুকলিনত দাখিল কৰা এক গোচৰত আমেৰিকাৰ অভিযুক্তসকলে কয় যে, ভাৰতত সৌৰশক্তিৰ চুক্তি লাভ কৰিবলৈ আদানী গ্ৰুপে ২৫ কোটি ডলাৰ (২১১০ কোটি টকা)ৰ উৎকোচ দিছিল বুলি অভিযোগ উত্থাপন হৈছিল। যাৰ বাবে গৌতম আদানিৰ বিৰুদ্ধে গ্ৰেপ্তাৰী পৰোৱানা জাৰি কৰিছে আমেৰিকাই।
উল্লেখ্য যে, গৌতম আদানীৰ লগতে সাগৰ আৰ আদানী আৰু বিনীত এছ জৈনেও আমেৰিকাৰ বিনিয়োগকাৰীক বিপথে পৰিচালিত কৰাৰ অভিযোগ উত্থাপন হৈছে।
এই সন্দৰ্ভত আদানী গ্ৰুপে এক বিবৃতি প্ৰকাশ কৰিছে। কোম্পানীয়ে কৈছে যে, আমেৰিকাৰ ন্যায় বিভাগ আৰু আমেৰিকাৰ ছিকিউৰিটিজ এণ্ড এক্সচেঞ্জ কমিছনে ব’ৰ্ডৰ সদস্য গৌতম আদানী আৰু সাগৰ আদানীৰ বিৰুদ্ধে নিউয়ৰ্কৰ পূব জিলাৰ বাবে আমেৰিকাৰ জিলা আদালতত অপৰাধমূলক অভিযোগনামা আৰু দেৱানী অভিযোগ জাৰি কৰা হৈছে।
আমেৰিকাৰ ন্যায় বিভাগে আদানী ব’ৰ্ডৰ সদস্য বিনীত জৈনক একেধৰণৰ অপৰাধমূলক অভিযোগত অন্তৰ্ভুক্ত কৰিছে। এই পৰিঘটনাৰ প্ৰতি লক্ষ্য ৰাখি কোম্পানীয়ে সিদ্ধান্ত লৈছে যে, গ্ৰুপৰ সহযোগী কোম্পানীসমূহে আপাততঃ প্ৰস্তাৱিত মাৰ্কিন ডলাৰৰ বণ্ড অফাৰৰ সৈতে আগবাঢ়ি নাযায়।
এই অভিযোগৰ পাছতেই আদানী গ্ৰুপৰ শ্বেয়াৰত প্ৰভাৱ পৰে।আমেৰিকাত গৌতম আদানীৰ বিৰুদ্ধে উৎকোচৰ অভিযোগ উত্থাপন হোৱাৰ পিছতে বৃহস্পতিবাৰে ভাৰতীয় শ্বেয়াৰ বজাৰত এক বিশৃংখলতাৰ সৃষ্টি হয়। আদানী গ্ৰুপৰ শ্বেয়াৰত ১০ৰ পৰা ২০ শতাংশ হ্ৰাস পোৱা দেখা গৈছে। উল্লেখ্য যে, আদানী এণ্টাৰপ্ৰাইজৰ শ্বেয়াৰ ১৫ শতাংশ হ্ৰাস পাইছে। আদানী বন্দৰ আৰু এছ ই জেড, আদানী শক্তি আৰু শক্তি আৰু সেউজ শক্তিৰ সৈতে জড়িত সকলো ষ্টকত বৃহৎ হ্ৰাস হোৱা দেখা গৈছে। যাৰ বাবে কেইমিনিটমানৰ ভিতৰতে আদানী গ্ৰুপৰ মাৰ্কেট কেপত ২.২৪ লাখ কোটি টকা লোকচান হয়।
